जमिम शाह हत्या प्रकरण : सरकारया मौन समर्थन ?

'भारतया विरोध याःगुलिं शाहया हत्या यानाःगु खः ।'

थ्व धापू छोटा राजन पुचःया दुजः भरत नेपालीया खः । सुनां संचार उद्यमी जमिम शाहया हत्या यानाःगु जिम्मा काःगु दु । नेपालीं जमिम शाहया हत्या जूगु कन्हय् कुन्हु अर्थात ८ फेब्रुअरी २०१०, सोमवाः स्पेस टाइमया मू ज्याकू व ऐभिन्यूज टेलिभिजनयात फोन यानाः थुगु जिम्मेवारी काःगु खः ।

थ्व जिम्मेवारी नापं आइतवाः हत्या जूम्ह संचार उद्यमी शाहयात सुनां स्याःगु धइगु न्ह्यसःया छगू हद तक लिसः मालेत अपूगु दुसां थुकीं यक्वः हे मेमेगु न्ह्यसःत ब्वलंका ब्यूगु दु ।

न्हापा निसें हे शाहयात भारतं पाकिस्तानी खुफिया एजेन्सी (आइएसआइ)या एजेन्ट व अन्डरवल्ड डन दाउद इब्राहिमया ग्वाहालिमि धकाः द्वपं बियातःगु खः । उकीयात तक्वः हे शाहं मखुगु द्वपं बियाः थःगु चरित्र हत्या यायेत स्वगू धकाः खण्डन यानाः लिप्पांगु इलय् तसकं 'लो-प्रोफाइल'य् च्वनाच्वनादीगु खः ।

न्हापा विवादय् लाम्ह जुसां लिप्पांगु इलय् गनं नं नां न्यने मदयाच्वंगु इलय् वंगु आइतवाः ७ फब्रुअरीया न्हि कुन्हु वयेकयात येँया तसकं सुरक्षित धाःगु थासय् गोलीं क्येकाः स्यानाबिल । सुरक्षित थाय् धयातःगु लाजिम्पाट, उकी नं उपराष्ट्रपतिं निक्वःगु खुशी सपथ ग्रहण याइगु धकाः अझ अप्वः सतर्कता नालातःगु ई खः । तर नं छगः मोटरसाइकलय् वयाः गोलीं क्येकाः न्हय्गू मिनेट तक सतकय् च्वनाः हत्यारातय्त अपूक हे बिस्यूवनेत ताः लात ।

थ्व घटनां सरकरया सुरक्षा व्यवस्था प्रति न्ह्यसः थनीगु लाः स्वभाविक हे जुल तर वस्वां नं तःधंगु खँ शाहयात गुकथं भारत विरोधीया द्वपं बियाः स्याःगु खः उकी सरकारया मौनता प्रति अप्वः न्ह्यसः थनीगु थाय् दु । अझ थुगु घटना प्रति भारतीय संचार माध्यं पाकिस्तानी एजेन्टयात गोलीं क्येकाः स्यात धकाः बुँख बियाच्वंगु व भारत सरकारं नं थुकी छुं प्रतिकृया मब्यूगुलिं थुकी भारतीय सरकारया प्रत्यक्ष वा अप्रत्यक्ष संल्गनताया न्ह्यसः नं ब्वलंगु दु ।

पाकिस्तानी एजेन्ट व दाउद इब्राहिमानाप सतिम्ह धकाः हे २०५५ असार १५ गते तत्कालिन सांसद मिर्जा दिलसाद वेगयात नं गोलीं क्येकाः स्याःगु खः । थुकीया अर्थ भारत विरोधीतय्त भारतया अन्डरवल्ड डनं भारतीय अधिकारीतय् ग्वाहालिइ स्याःगु पुष्टि यायेत थप बल बीइ ।

यदि भारत सरकारं थुकी प्रत्यक्ष वा अप्रत्यक्ष ग्वहालि यानाच्वंगु दुसाः वथंज्याःगु घृणित ज्या मेगू छुं जुइ मफइगु लाः दु हे दु तर वस्वयां न्ह्यः शाह छम्ह नेपाःमि जूगुलिं वयाः सुरक्षा बीगु जिम्मा नेपाः सरकारया खः । नापः छुं नं विदेशी संघ संस्थां वयात छुं कथंया द्वपं ब्यूसाः वयाः बचाउ यायेगु जिम्मा नेपाः सरकारया हे खः ।

तर थन सरकार प्रमुख प्रधानमन्त्री, उपप्रधानमन्त्री लगायत शाहया छेँय् वनाः बिचाः हायेकेगु बाहेक सरकारया पाखें आधिकारीक रुपं नं त भारतीय संचार माध्यं बियाच्वंगु द्वपंया खण्डन यायेत स्वःगु दु न त भारतीय अधिकारीतय्त नाप लानाः थुकीया बारे स्पष्टिकरण फ्वनेगु आँट हे याःगु दु ।

यदि छम्ह आम नेपा:मियात थीथी द्वपं बियाः विदेशीतय्सं नेपाः दुने न्हिनय् हे गोलीं क्येकाः स्यायेगु प्रति नेपाःया सरकार सुम्क च्वनीसाः उकीया अर्थ नेपाःमितय् के अझ नं स्वतन्त्रता मदुनी, नेपाः अझ नं स्वाधीन मजूनी धाःगु खः । अझ सरकारी मौनतां सुनं नेपाःमि याके विदेशीतय् विरुद्ध न्ववायेगु हक मदु व सुनां न्ववासाः उकीया लिच्वः शाहया हत्या खः धकाः धयाच्वंगु आभाष जूइ । अथे धइगु विदेशीतय्सं नेपालय् वयाः नेपाःमियात गोली क्येकाः स्याःगु प्रति सरकारया मौन समर्थन खः धा:सां छुं पाइ मखु ।

asmeet@nepalmandal.com

More Stories Like this