भारतं स्यंकाच्वंगु नेपाःया सुरक्षा व्यवस्था

थःत मयःम्ह सुं नं मनूयात भारतं चाहे जुल धाःसा खुल्ला सतकय् न्हिनय् हे वयाः नं गोलीं कयेकाः स्याना बीफु धइगु खँ आः नकतिनि जूगु सञ्चार उद्यमि जमिम शाहया हत्यां पुष्टि याना बिउगु दु। हत्या सुनां याःगु धकाः आः तक प्रहरीं धाःगु मदुनि। पक्का दु, थ्व धाइ नं मखु। न गोलीं कयेकूपिंत हे ज्वनी। थ्व हत्याय् अन्तर्राष्ट्रिय आपराधिक पुचःया ल्हाः दु धकाः प्रहरीं थःपिनि कमजोरी सुचुकेगु कुतः ला याःगु दु तर व पुचः खः, छाय् उमिसं हत्या यात धइगु खँ धाःसा नेपाःया प्रहरीं गबलें खुलासा याइ मखु। उकी नेपाली जनता ढुक्क हे जूसां जिउ। छाय् धाःसां थ्व हत्या अज्याःगु पुचलं याःगु दु गुकियात नेपाः सरकारं गबलें नं पर्दाफास यायेगु आँट याइ मखु। शाहया हत्या जुइवं हे भारतीय मिडियां 'छम्ह पाकिस्तानी एजेण्ट मंत' धकाः याःगु हर्ष बढाईंपाखें नं थ्व हत्या छाय् व सुनां याःगु धकाः प्रस्ट जू ।

थ्व हत्या थौंकन्हय् भारतया कडा विरोध याना जूपिं माओवादी नेतातय्त नं बिउगु मेगु छगू ख्याच्वः जुइफु। माओवादी अध्यक्ष प्रचण्डं थःपिं राष्ट्रिय स्वाधीनताया आन्दोलनय् लगे जुयाच्वनागुलिं थःपिनि जीवन नं सुरक्षित मजू धयाच्वंगु इलय् हे भारतं न्हापांनिसें निशाना दयेकातःम्ह छम्ह मनूया हत्या जूगु दु। थ्व संयोग जक ला अवश्य नं खइ मखु ।

थ्व स्वयां न्ह्यः भारतं नेपाःया सांसद मिर्जा दिलसाद बेगया हत्या याकूगु खः। बेगयात नं दाउद इब्राहिमलिसे स्वापू दुम्ह धकाः द्वपं बियातःगु खः। मिर्जा लिपा जमिमयात सिधयेकल। नेपाःया सुरक्षाय् भारतं न्ह्यसः तयेगु याः, वास्तवय् झीगु सुरक्षा सुनां स्यंकाच्वन धइगु खँ थुकिं पुष्टि जू ।

More Stories Like this