सिक्किमय् हानं नेवाः प्याखं

नेपालं पिने खयां नं प्रशस्त नेवाः गतिविधि जुयाच्वनीगु भारतीय राज्य सिक्किमय् थुगुसी हानं मेगु पुचःयात नेवाः बाजं व प्याखं स्यनेगु ज्या शुरु जूगु दु। ज्याझ्वलय् सिक्किमया थीथी थासं वयाच्वंपिं ४५ म्ह भाजु मय्जुपिंसं उत्साहजनक रुपं ब्वति कयाच्वंगु दु ।

राजधानी गान्तोकं पश्चिम पाखे ६ घण्टा गाडीं वनेबलय् थ्यनीगु देन्ताम धाःगु थासय् स्थानीय नेवाःतय्गु संगठन 'न्हूजः गुथि'या ग्वसालय् थ्व प्रशिक्षण जुयाच्वंगु खः।
नेवाः प्याखं स्यनेगु निंतिं मध्यपुर कला परिषद्पाखें मय्जु शर्मिला महर्जन उखे झाःगु खः। वय्कलं लछि तक कयादीगु प्याखं स्यनेज्या नकतिनि क्वचाये नं धुंकूगु दु ।

अथे हे नेपालं हे झाःम्ह कुलरत्न मानन्धरं अन नेवाः बाजं स्यनादीगु खः ।

प्याखं व बाजंया प्रशिक्षण काःपिं प्रशिक्षार्थीतय्त थ्वहे वइगु शुक्रवाः (१२ फेब्रुअरी) कुन्हु छगू ज्याझ्वः यासें सार्वजनिक याइगु ग्वसाः दु। ज्याझ्वलय् अन प्रशिक्षण काःपिं प्रशिक्षार्थीतय्सं थःथःपिनि प्रतिभा ब्वयादी ।

ज्याझ्वलय् मूपाहां कथं मध्यपुर कला परिषद्या भाजु गणेशराम लाछि म्हिगः उखे झायेधुंकूगु दु ।

थ्वहे प्रशिक्षणया झ्वलय् अन नेवाः भाय् स्यनेगु कक्षा नं न्ह्याःगु खः। नेवाः भाय् व लिपि स्यनेगु ज्या धाःसा अन हे च्वंपिं शिक्षपिं किरण प्रधान, डीएम प्रधान व दिलु प्रधानं यानादीगु खः। थौंकन्हय् भाषा व लिपि स्यनीपिं प्रशिक्षकत सिक्किमय् हे तयार जुइधुंकूगु दु। न्हापा भाषा व लिपिया थज्याःगु क्लास कायेगु लागिं नं नेपालं मनू वनेमाःगु खः। तर आः भाषा स्यनीगु जनशक्ति अन हे तयार जुइधुंकूगु दु।
सिक्किमय् नेवाः भाय्, लिपि, बाजं, प्याखं स्यनीगु छगू बिस्कं हे इन्स्टिच्युट चायेकेगु ज्या नं थौंकन्हय् न्ह्यानाच्वंगु दु। अनया नामथान धाःगु थासय् थ्व इन्स्टिच्युट चायेकेगु कुतः जुयाच्वंगु खः। उकिया निंतिं माःगु नक्सा, डिजायन आदि फुक्कं तयार जुइधुंकल। आः भवन दयेकेगु प्रारम्भिक ज्या न्ह्यानाच्वंगु दु ।

खास यानाः सिक्किमया स्कूलय् नं नेवाः भाय् ब्वने दइगु व्यवस्था सरकारं याना बीवं उकिया लागिं दक्ष जनशक्तिया तःधंगु आवश्यकता अन जुया वःगु दु। माल धाःसा सिक्किम सरकार उच्चशिक्षा थ्यंकं हे नेवाः भाय् ब्वंकेत तयार दु। तर समस्या खः, जनशक्तिया अभाव। वहे जनशक्ति तयार यायेगु लागिं नं अन थुकथंया इन्स्टिच्युट चायेकेगु कुतः जुयाच्वंगु खः। थुकियात नं सरकारं ग्वाहालि यानाच्वंगु दु ।

More Stories Like this