प्रहरी हे शंकास्पद : उपप्रम

जमिम शाहया हत्यां सुजाता कोइराला आक्रोशित

येँ (सन्ध्या टाइम्स)/सञ्चार उद्यमि जमिम शाहयात अतिकं कडा सुरक्षाया दथुइ न्हिनय् हे गोलीं कयेकाः स्याना बिलं नं प्रहरीं छुं याये मफुगु खँयात कयाः उपप्रधानमन्त्री एवं परराष्ट्र मन्त्री सुजाता कोइराला आक्रोशित जुयादीगु दु ।

लाजिम्पाट लागाय् आपालं विदेशी राजदूतत दुगुलिं अथें नं सुरक्षित लागा, उकिसनं उपराष्ट्रपति परमानन्द झाया सपथ ग्रहण व बेलायती सेनाध्यक्ष नेपाः वयाच्वंगुलिं राजधानीइ कडा सुरक्षा व्यवस्था यानातःगु इलय् हे जमिम शाहयात स्याना बिउगु अतिकं गम्भीर खँ खः धासें उपप्रम कोइरालां थ्व घटना बारे जक मखु थुकिया सम्बन्धय् प्रहरी दुने नं छानबिन यायेमाःगु माग समेत यानादीगु दु ।

थौं सुथय् मदुम्ह शाहया छेँय् वनाः वय्कःया छेँजःपिंत बिचाः हायेकेगु झ्वलय् वय्कलं थ्व खँ धयादीगु खः। वय्कलं धयादिल, 'अज्याःगु कडा सुरक्षाया इलय् नं अपराधी बिसिउँ वन, थुकिं ला प्रहरीयात नं शंका यायेमाःगु जूगु दु ।'

घटनायात कयाः सरकारं गठन याःगु छानबिन आयोगयात नं वय्कलं आलोचना यानादिल। उकियात कयाः वय्कलं धयादिल, 'अपराधीयात ज्वने मफइगु छानबिन आयोग गठन याःसां उकिया छुं हे औचित्य मदु ।'

वय्कलं थ्व घटनायात कयाः गृह मन्त्रालय जक मखु थःगु परराष्ट्र मन्त्रालयपाखें नं छानबिन यायेगु खँ नं धयादिल। देय्या सुरक्षा संयन्त्र थथे कमजोर जुयाच्वंगु इलय् सुरक्षा निकायया फुक्क हे प्रमुखत ज्वनाः गृह मन्त्री विदेश भ्रमण वनाच्वंगु नं पाय्छि मजूगु खँ वय्कलं धयादिल ।

शाहया हत्याया जिम्मा भारतया अन्डरवर्ल्ड डन छोटा राजनं काःगु दु। शाह भारत विरोधी जूगुलिं वयात स्यानागु खँ नं छोटा राजन पुचलं धाःगु दु ।

थौं पत्रकारतय् प्रदर्शन

येँ(सन्ध्या टाइम्स)/संचारकर्मी जमीम शाहया हत्याया विरोधय् नापं देशय् शान्ति सुरक्षाया माग यासें नेपाल पत्रकार महासंघं थौं छगू विरोध प्रदर्शन याइगु जूगु दु। सनिलय् ३ बजे येँया भृकुटीमण्डप लागां उगु जुलुस पिकयाः देय्चाःहिलेगु व बसन्तपुली थ्यंकाः क्वचायेकेगु ज्याझ्वः तयातःगु दु। स्पेसटाइम नेटवर्कया अध्यक्ष नापं च्यानल नेपालया संचालक जमीम शाहयात वंगु आइतवाः न्हिनय् हे गोलीं कयेकाः स्याना बिउगु घटनायात कयाः पत्रकारतय्सं थ्व प्रदर्शन यायेत्यंगु खः।