हत्याय् अन्तर्राष्ट्रिय नेटवर्क
जमिम शाहया अन्त्येष्टि थौं हे याइगु
येँ (सन्ध्या टाइम्स)/सञ्चार व्यवसायी जमिम शाहयात गोलीं कयेकाः स्यायेगु ज्याया लिउने अन्तर्राष्ट्रिय नेटवर्किङ्ग दुगु गिरोहया ल्हाः दुगु खँ सरकारं ठहर याःगु दु। म्हिगः जूगु हत्याया बारे सहलह यायेत थौं च्वंगु गृह मन्त्रालयया सुरक्षा समितिया आकस्मिक बैठकं थ्व निष्कर्ष पिकाःगु खः। अथे खःसां हत्यारा पुचः थ्वहे खः धइगु निर्क्यौल धाःसा गृहं याःगु मदु। लिसें गृहं शाहयात स्याःपिं मनूत पेशेवर अपराधी खः धकाः नं ठहर याःगु दु ।
हत्याया लिउने भारतया ल्हाः दयेमाः धइगु अनुमान जुयाच्वंगु इलय् गृहया सुरक्षा समितिं थ्व निष्कर्ष पिकाःगु खः ।
म्हिगः राष्ट्रपति भवनय् उपराष्ट्रपतिया सपथ ग्रहण ज्याझ्वः दुगुलिं महाराजगंजया लागाय् पूर्ण सुरक्षा बियातःगु खः। अज्याःगु इलय् सुरक्षाकर्मीतय् दथुइ खुलेआम गोलीं कयेकाः अपराधी बिसिउँ वनं नं प्रहरीं ज्वने मफुगुलिं देय्या सुरक्षा स्थितिइ तःधंगु हे कमजोरी दुगु खँ नं पुष्टि जूगु खँ धाःगु दु ।
भाजु शाह म्हिगः होटल याक एण्ड यति होटलय् सौना बाथ यानाः पानीपोखरीया थःगु छेँय् लिहां वनाच्वंगु इलय् उगु आक्रमण जूगु खः ।
उखे प्रहरीपाखें म्हिगःया घटनाय् सुरक्षा निकायपाखें गल्ती जूगु खँ स्वीकार यायेधुंकूगु दु। गृह मन्त्री भिम रावल नापं तुं सुरक्षा निकायया स्वम्हं प्रमुखत चीन वनाच्वंगु इलय् देशय् थ्व घटना जूगु खः। गृह मन्त्री रावल नेपाःया सुरक्षा स्थिति बांलाः धकाः चीनयात ढुक्क यायेत हे उखे झायाच्वंम्ह खः।
थ्वहे झ्वलय् माओवादी न्वकु डा. बाबुराम भट्टराई थौं मदुम्ह शाहया छेँय् वनाः बिचाः हायेकुसें घटनाया विवरण कयादीगु दु ।
मदुम्ह जमिम शाहया अन्त्येष्टि नं थौं हे यायेगु तयारी जुयाच्वंगु दु ।
भाजु शाहं नेपालय् स्पेश टाइम नेटवर्क चायेकाः न्हापांखुसी केवुल व्यवसाय शुरु यानादीगु खःसा नेपालय् न्हापांगु निजी क्षेत्रया टिभी 'च्यानल नेपाल' नं शुरु यानादीगु खः ।
