शंखधरया नामं विमानस्थल
उड्डयन प्राधिकरणपाखें नां पारित
नेपाःया छगूयां छगू जक अन्तर्राष्ट्रियस्तरया विमानस्थल त्रिभुवन अन्तर्राष्ट्रिय विमानस्थलया नां आः 'शंखधर साख्वाः अन्तर्राष्ट्रिय विमानस्थल' जुइगु जूगु दु । थुकिया निंतिं थीथी निकायपाखें माःगु पलाः न्ह्याकेधुंकूगु दुसा यदि दथुइ छुं नं कथंया पंगः मवल धाःसा याकनं हे सरकारं थुकिया निर्णय सार्वजनिक याये फुगु खँ सूत्रं धाःगु दु ।
सूत्रं बिउगु जानकारी कथं आः नकतिनि हे नागरिक उड्डयन प्राधिकरणं त्रिभुवन अन्तर्राष्ट्रियविमानस्थलया नां हिलाः 'शंखधर साख्वाः अन्तर्राष्ट्रिय विमानस्थल' नामाकरण यायेगु धकाः निर्णय याये धुंकूगु दु । उड्डयन प्राधिकरणया नकतिनि च्वंगु बोर्ड बैठकं थ्व नां पारित यासें आः स्वीकृतिया लागिं मन्त्रिपरिषदय् छ्वयेत्यंगु खँ सीदुगु दु । प्राधिकरणया उगु सिफारिस मन्त्रिपरिषदय् धाःसा पेश मजूनि । यदि अनं नं पारित जुल धाःसा विमानस्थलया नां हिलीगु खँ सूत्रं धाःगु दु ।
सरकारं थुगुसी तिनि औपचारिक रुपं सरकारी मान्यता बिउगुनेपाल संवत्या प्रणेता शंखधर साख्वाःयात सरकारीस्तरं सम्मान बीगु लागिं विमानस्थलया नां हे वय्कःया नामं तयेत्यंगु खँ सूत्रं धाःगु दु ।
त्रिभुवन अन्तर्राष्ट्रिय विमानस्थलया नां शंखधरया नामं तयेतइनाप यासें नेवाः देय् दबूपाखें उकुन्हु तिनि पर्यटन तथा नागरिक उड्डयन मन्त्री हिसिला यमियात छगू ज्ञापनपत्र लःल्हाःगु खः । थ्व बाहेक मेपिं जनसाधारणपाखें नं सरकारयात शंखधर साख्वाःया नामं विमानस्थलया नां तयेत थीथी माध्यमं इनाप यायेगु ज्या जूगु खँ सीदुगु दु ।
थुकिया नापनापं प्राधिकरणं देय्या थीथी जिल्लाय् लानाच्वंगु विमानस्थलया स्तर थकयाः अन्तर्राष्ट्रिय स्तरया दयेकेगु तयारी यानाच्वंगु खँ नं सीदुगु दु ।
