मेगु लँपुं वयेत्यंगु एअर मार्शलया प्रस्ताव

नेपाः ब्वया वइगु भारतीय विमानय् एअर मार्शल तयेगु धकाः भारत सरकारं याःगु इनापयात नेपालं अस्वीकार यायेवं आः भारतं सार्क संगठन मार्फत थ्व प्रस्ताव हयेगु तयारी याःगु समाचार पिहां वःगु दु। नेपाः वइगु विमानय् एअर मार्शल त हे तये धइगु भारतीय कुतःया थ्व मेगु शैली खः। सार्क दुने पाकिस्तान छगू त्वःताः मेगु फुक्क हे देय् भारतीय छत्रछायाय् लाः। उकिं उपिंलिसे अज्याःगु सम्झौता यायेत थाकु जुइ मखु धइगु भारतया बिचाः जुइमाः। तर सार्कया मेमेगु देय्त तयार जूसां पाकिस्तान छगू धाःसा तयार मजुइ ला धइगु ग्याःचिकु नं भारतयात जुयाच्वंगु दु।
नेपाःया सुरक्षा व्यवस्थाय् भारतया विश्वास मदु। सुरक्षा स्थिति स्यंस्यं वनाच्वंगु कारणं भारत जक मखु चीनं नं चिउताः क्यना हःगु दु। अय् जुयाः नेपाःया गृह मन्त्री देय्या स्वंगुलिं सुरक्षा निकाया प्रमुखत ज्वनाः चीन व भारत ब्वाँय् जुइ मालाच्वंगु खः। चीन व भारतं नेपाःया सुरक्षास्थितियात कयाः राजनीतिक प्रतिवद्धता जक दयां धाथें उकी ज्या यानाच्वंपिं मनूतय्गु हे प्रतिवद्धता माः धइगु खँ समेत ल्ह्वना हःगुलिं हे सुरक्षा निकायया हाकीमतय्त नं थः नापं तुं विदेश यंके मालाच्वंगु खः। वास्तवय् नेपाःया सुरक्षा मामिलाय् शंका जुयाः हे भारतं थ्व एअर मार्शलया खँ न्ह्यःने हःगु नं प्रस्ट हे जू। उखे नेपाःया सुरक्षास्थिति धाःसा विश्वया फुक्क हे देशं शंका यायेबहः जुइक स्यना वनाच्वंगु धाःसा सत्य खः। उकिं नेपालं थ्व एअर मार्शलया खँयात धाथें हे अस्वीकार यायेगु खःसा नेपाःया सुरक्षास्थिति नं बल्लाका तयेमाःगु आवश्यकता दु। सरकार थुखेपाखे गम्भीर जुइमाःगु खनेदु ।

More Stories Like this