सुयागु ल्हाः दु वयागु हत्याया लिउने ?

येँ (सन्ध्या टाइम्स)/समसामयिक नेपाःया सन्दर्भय् जमिम शाह छम्ह तसकं थुइके थाकुम्ह व्यक्तित्व खः। नेपाली मिडियाय् जक मखु छगू इलय् नेपाःया राजनीतिइ तकं जमिम शाह चर्चाया विषय जूगु खः। जातं मुस्मां खःसां येँया वटु त्वालय् जन्म जुयाः नेवाः समुदाय नापनापं तुं तःधिकः जूम्ह जमिम शाह छथुं हे देय्या 'मिडिया टाइकुन' जुया वःगु खनाः वयात म्हसिउपिं मनूत तीनछक जुल। वास्तवय् वयागु उदय, वयागु पतन व वयागु हत्या स्वतां वयात म्हसिउपिं मनूतय् निंतिं बिचाः याये मफइगु हदया आश्चर्यया विषय जुयाच्वंगु खः ।

नेपाली सञ्चार ख्यलय् तःगूमछि न्हूगु ज्या जमिम शाहं याःगु दु। दकलय् न्हापां ला न्ह्याबलें नेपाल टेलिभिजन छगू स्वयां म्हाइपु छ्याये मालाच्वंपिं नेपाली दर्शकतय्त रिमोट तियाः संसारया फुक्क च्यानलत थःगु टिभीइ स्वये फइ कथं केबुल प्रणाली दुत हःम्ह जमिम शाह हे खः। स्पेश टाइम नेटवर्क धकाः शाहं शुरु याःगु केबुल टिभीं नेपाली दर्शकतय् टेलिभिजन स्वयेगु बानी हे हीका बिउगु खः। नेपालय् थ्व छगू सञ्चार क्रान्ति जुयाः हे दुहां वल धाःसां छुं मपाः। थ्वयां लिपा ला झीथाय् त्वात्वालय् हे केबुल टिभीत पिहां वल।
खतुं समाजय् जमिम शाह सम्बन्धी विवादया लुखा नं थनंनिसें हे चाला वंगु खः। अबलय् वं केबुल टिभीया लागिं हःगु सामानय् लुँ सुचुका हल धकाः थन तःधंगु हे बबाल जूगु खः। तर व फुक्क बबाल व विवादयात चीकाः अन्ततः स्पेश टाइम चायेकेत जमिम शाह सफल जुयां तुं त्वःतल ।

वयां लिपा वयागु पलाः थःगु हे टेलिभिजन च्यानलपाखे वन। अबलय् नेपालय् दुगु हे नेपाल टेलिभिजन छगू। जमिम शाहं 'च्यानल नेपाल' धइगु मेगु छगू च्यानल सञ्चालन यानाः नेपालय् निजी क्षेत्रया टिभी च्यानलतय् कुलां चायेका बिल। 'च्यानल नेपाल' वयेधुंकाः हे तिनि थन मेमेगु टेलिभिजन च्यानलत नं शुरु जूगु खः ।

टेलिभिजनया सफलता लिपा धाःसा वयागु महत्वाकांक्षां मखुगु दिशा ज्वन, पत्रिका पिकायेगु ज्या यानाः। वं 'स्पेश टाइम' नांगु खय् भाय्या ब्रोडशिट न्हिपौ पिकाल। उकिया नापनापं अंग्रेजी न्हिपौ नं। 'स्पेश टाइम' न्हिपौ पिहां वयाः तत्कालिन नेपाली मिडियाय् छगू हलचल ला वल, लिसें व न्हिपौ पिहां वसांनिसें जमिम शाहया आर्थिक स्थितिइ डाँवाडोल नं शुरु जुल। न्हिपतिं बांलाक गति काये मफयाः उकिया लिच्वः टिभी च्यानलय् नं लाः वन। व, थुकिं यानाः ब्वलंगु आर्थिक संकट समाधान यायेगु लागिं स्पेश टाइम नेटवर्कं कमे याना तःगु दां फिइ लः प्वंकू थें प्वंके माला वन।
वहे इलय् सञ्चालनय् वःगु कान्तिपुर टेलिभिजनयात थःगु केवुलं प्रशारण याके मखु धकाः जमिम शाहं काःगु अडानं यानाः देशय् निगू केबुल पुचःया दथुइ 'केबुल वार' हे शुरु जुल। थुकिं वयात लबः सिबें हानी हे अप्वः यात ।

ध्यबा दत कि मनूतय्सं राजनीति नं प्रभावित याये फइ। जमिम शाहया पहुँच नं उकथं हे विस्तार जुया वन। थुलि तक कि अबलय् तसकं शक्तिशालीम्ह नेपाली कांग्रेसया सभापति गिरिजप्रसाद कोइरालाया बेड रुमय् तक पहुँच दुपिं तसकं म्हो जक मनूत मध्ये छम्ह जमिम शाह नं जुल। कोइराला जक मखु, कोइरालाया म्ह्याय् सुजाता व सुजाताया नं म्ह्याय्लिसे तकं जमिमया स्वापू क्वातु। कोइराला जक मखु दरवारलिसे नं वयागु स्वापू उलि हे बांलाः। माघ १९ लिपाया शाहकालय् जमिम शाहं केबुल नेटवर्क सम्बन्धी छगू थज्याःगु विधेयक हयेकेत ठिक्क यायेधुंकूगु खः गुगु वःगु जूसा नेपालय् स्पेश टाइम छगू बाहेक मेपिं फुक्क हे केवुल व्यवसायीतय् पसः बन्द जुइगु खः ।

तर फुक्कलिसे स्वापू बांलानां नं भारतलिसे धाःसा वयागु स्वापू तसकं खराब। भारतं वयात पाकिस्तानी एजेण्ट धकाः द्वपं बिलसा भारतीय अखबारतय्सं आईएसआई व डाउड इब्राहिमया मनू धकाः नं च्वया हल। यद्यपि थ्व पुष्टि हे जूगु खँ ला मखु अथे खःसां थ्वहे कारणं वयागु हत्याया लिउने भारतया हे ल्हाः दयेमाः धकाः अनुमान यायेगु थाय् धाःसा दया बिउगु खः। यद्यपि थुकियात गुलिस्यां 'ग्याङ्ग वार' नं धायेफु। अथे खःसां भारतं पाकिस्तानी एजेण्ट धकाः द्वपं बियातःम्ह पुलांम्ह मन्त्री मिर्जा दिलसाद बेगयात नं थथे हे गोलीं कयेकाः स्याना बिउगु कारणं निगुलिं घटनाया 'मकसद' धाःसा छता हे खः धइगु प्रमाणित जू ।

प्रस्ट नेवाः भासं खँ ल्हाइम्ह, नेवाःनी हे ब्याहाः यानातःम्ह व आपालं नेवाःत हे पासा दुम्ह जमिम शाहं थःगु हे पहलय् च्यानल नेपालय् नेवाः कार्यक्रम सञ्चालन याके बिउगु खँयात धाःसा नेवाःतय्सं ल्वःमंके मफइगु स्वाभाविक खः ।

More Stories Like this