समाजया रुपान्तरण गुखेपाखे वनाच्वन ?

राजधानीया ठमेल थेंज्याःगु व्यस्त लागाय् हानं छक्वः पेस्तोल क्यनाः लुटे यायेगु ज्या जूगु दु। लुटेरातय्सं अनया छगू मनि चेन्जरय् ध्यबा कयाः वयाच्वंम्ह सञ्चालकयात गोलीं कयेकाः वयाके च्वंगु दां लुटे याना यंकूगु खः। आः थज्याःगु लुटपाटय् नं पेस्तोल ज्वना वयेगु धइगु तसकं सामान्य खँ जुइधुंकूगु दु। थ्व बाहेक नं तःगूमछि हे घटनाय् थथे पेस्तोल क्यनाः लुटपाट जूगु दुसा छुं न्हि न्ह्यः तिनि छेँ दनेगु सामान पिने वांछ्वया तल धइगु छगू सामान्य खँय् तकं ल्वापु जुयाः गोलीं कयेकेगु तकया ज्या जूगु खः गुकी लानाः छम्ह निर्दोष मचाया ज्यान वन ।

थुकिं प्रस्ट यानाच्वंगु दु कि आः राजधानीइ पेस्तोल थेंज्याःगु चीधंगु ल्वाभः ज्वना जुइपिं मनूत अनुमान यानातःगु स्वयां अप्वः हे दयेधुंकूगु दु। छगू सामान्य ल्वापु जुइसातकि हे पेस्तोल चले जुइगु घटना आः अप्वयाच्वंगु दु। खतुं थुकियात माओवादीपाखें सञ्चालन याःगु झिदँ ताःहाकःगु जनयुद्धं पित हःगु मेगु कथंया विकृति धाःसां जिउ। छाय्धाःसां जनयुद्धं आः मनूतय्त पेस्तोल ज्वना जुइ थाकु मजूगु ज्या खः धकाः बांलाक हे थुइका बीधुंकूगु दु। उकिसनं सुनां अज्याःगु ल्वाभः ज्वनातःगु लु हे लुल धाःसां नं वयात कारवाही मयायेगु देय्या प्रशासनिक निकायया ज्यां थुकियात अझ प्रोत्साहित यानाच्वंगु दु। राजनीतिका कारणं यानाः सुरक्षा निकायय् नं थुखेपाखे ध्यान बी तकं मलानाच्वंगु मेगु विडम्बना खः। देशय् सामाजिक रुपान्तरणया खँ ला तच्वयेक हे जुयाच्वंगु दु तर समाज गुखेपाखे रुपान्तरण जुयाच्वन धइगु खँया संकेत धाःसा थज्याःगु घटनां बियाच्वंगु दु। छु नेपाली जनतां चाहे जूगु रुपान्तरण थज्याःगु हे खः ला ?

More Stories Like this