एअर मार्शलया प्रस्ताव सार्कय्
नेपालं स्वीकार मयायेवं भारतया मेगु दाउ
तर पाकिस्तान माने मजुइफु / नेपाःया सरकार क्वःथलेगु ख्याच्वः
येँ (सन्ध्या टाइम्स)/भारतं नेपाः ब्वया वइगु विमानय् एअर मार्शल तयेत याःगु इनापयात नेपालं 'अस्वीकार' यायेवं आः भारतं सार्क संगठन दुने थ्व प्रस्ताव यंकेगु तयारी शुरु याःगु दु। सार्क संगठनया फुक्क हे देय्तलिसे एअर मार्शल तयेगु सम्बन्धी मंकाः सम्झौता यायेगु न्हूगु बिचाः भारतं न्ह्यःने हयेत्यंगु खँ सूत्रतय्सं धाःगु दु ।
सार्क संगठन दुने थ्व प्रस्ताव यंकेबलय् मेमेगु देय्त माने जूसां पाकिस्तान छगू धाःसा माने जुइगु खः लाकि मखु धइगु चिन्ता भारतयात जुयाच्वंगु खँ नं धाःगु दु। पाकिस्तान दुहां वइगु विमानय् भारतीय ल्वाभः सहितया सेनायात पाकिस्तानं स्वीकार मयायेफुगु खँ भारतीय अधिकारीतय्सं धाःगु दु ।
खतुं एअर मार्शल धइगु विदेश वनीगु थःपिनि विमानय् गोप्य रुपं तया छ्वइगु खः। अथे खःसां दथुइ छुं कथंया समस्या वा भ्रम ब्वलन धाःसा अबलय् छु यायेगु धइगु खँ क्वःछीत न्ह्यव हे सम्झौता याना तयेमाःगु खँ धाःगु दु। खास यानाः विदेशी भूमिइ थःपिनि विमान अवतरण जुइधुंकाः उकी च्वना वंपिं जवानतय् ल्वाभः गन तयेगु, छुं जुयाः उमिसं विमान दुने सुयातं ज्वन धाःसा वयात गन सुपुर्दगी यायेगु धइगु खँय् न्हापा हे सहमति जुइमाः। अय् जुयाः नं भारतं एअर मार्शल तयेगु प्रस्ताव व सुपुर्दगी सन्धिया खँ नापनापं हे नेपाः न्ह्यःने तयाच्वंगु दावी सूत्रं याःगु दु।
यदि एअर मार्शल तयेगु थ्व प्रस्ताव सार्क संगठन दुने पारित याके मफुत धाःसा भारतं सार्क संगठन दुने च्वंगु मेमेगु देशतय्त याकः याकः जूसां प्रस्ताव तयाः सम्झौता याना छ्वयेगु रणनीति नं दयेकूगु दु। भारतं वंगु लाय् तिनि अमेरिकालिसे थथे एअर मार्शल तयेगु सहमति याःगु खः।
थ्वहे झ्वलय् मेगु छगू सूत्रं धाः कथं एअर मार्शल तयेगु थःपिनि प्रस्ताव स्वीकार मयाःगुलिं भारतं नेपाःया वर्तमान सरकार क्वःथलेगु तकया सांकेतिक ख्याच्वः नं बिया हयेधुंकूगु दु। नेपालं धाःसा लिसः बिउगु मदुनि ।
