पशुपतिया भट्ट विवाद

- उत्तमराज शिलाकार

पशुपति महाद्यःया देगलय् पुलांपिं भट्टिपंसं राजीनामा बी धुंकाः सरकारं मूल भट्ट नियुक्ति यायेगु खँय् निम्ह राजोपाध्याय ब्रम्हूत तयेगु पलेसा खँय् ब्रम्हूतय्त तःगु कारणं पिहां वःगु विवाद तच्वयाः सर्वाच्चय् थ्यंसेलि सर्वोच्चं पुलांपिं भारतीय भट्टतय्त हे आःयात तयाः पुजाआजा न्ह्याकेगु आदेश बिउगु दु । पशुपित महाद्यः व उगु लागाय् छुं कथंया स्वापू तकं मदुपिं निम्ह ब्रम्हूतय्त मूल भट्ट दयेकूगुलिं थ्व विवाद तच्वया वंगु खः । विवादया कारणं थौंतक गबलें मजू कथं अनया नित्य पुजा तकं प्रभावित जुल । धर्म संस्कृति धइगु अथें नं संवेदनशील क्षेत्र खः । उकिं धार्मिक आस्थाय् लिच्वः लाइगु ज्या सुनानं याये मजिउ । मेमेगु क्षेत्रय् थें राजनीतिक नियुक्ति थन मान्य जुइ मखु । उकिं सरकारं स्थानीय निकाय व थ्व नापं सम्बन्धित क्षेत्र नापं सहलह ब्याकाः जक नियुक्तिया ज्या यायेमाःगु खः ।

थन बिचाः यायेमाःगु खँ छु धाःसां पशुपतिया नित्यकर्म यानाच्वंपिं भारतया पुजारी (भट्ट) तय्सं राजीनामा छाय् बिल ? धायेत ला राजनीतिक दबावया कारणं उमिसं राजीनामा बिउगु खः धकाः धायेगु यानाच्वंगु दु । तर खँ मेकथं नं जुइफु । पशुपति विकास कोष व पशुपतिइ पुजा याईपं भट्टतय् दथुइ पशुपतिया धन सम्पत्ति भेटी व दक्षिणाया खँय् तःक्वः हे विवाद जुयाच्वंगु खः । इलय् ब्यलय् भट्टतय्सं थनया धन थःगु छेँ भारतय् यंकूगु खँ नं पिहां वः । आः सरकारं थन नं निगरानी तयाः हःगुलिं जकं उमित मिछंगु खःला ? यक्व न्ह्यवं निसें थन नेवाः ब्रम्हूतय्त पुजारी यायेमाः धका थनया राजोपाध्यायतय्सं पशुपति विकास कोष मार्पुत माग यानाच्वंगु वा नेपालयात धर्मनिरपेक्ष याःगु खँय् चित्त बुझे मजूपिंसं हाकनं 'हिन्दू अधिराज्य हे' दयेकेमाः धकाः थुगु पलाः ल्ह्वंगु खःला खँ न्ह्यागु हे जूसां पुलांपिं भारतीय भट्टतय्गु राजीनामा व राजोपाध्याय नेवाः ब्रम्हूत नियुक्त मयाकेगु ज्याया दथुइ छुं स्वापू जकं दुला सर्वोच्चया आदेशं थुगु ल्वापु चाःचाः हिलाः हाकनं पुलांगु थासय् लाःवंगु दु ।

थ्व खँ थनं जक नं क्वमचाः । थुकी पुलांम्ह जुजु ज्ञानेन्द्र शाहं तकं चिउताः काःगु दु । भारतया नेतातय्सं नापं चिउताः कया हःगुलिं नं थुगु ज्याय् भारतया चाल दये फुगु शंका याये थाय् दु । भारतयात पशुपतिया भेटी कथं दइगु रकमय् म्हति जुइगु खनाः जकं थथे भट्टतय्त राजीनामा बीकूगु खःला ? पशुपतिइ द. भारतीय पुजारीया राजीनामा व थन नेपाली हे पुजारी तयेगु खँय् पशुपति विकास कोषं स्वीकृत जुयाः हे प्रधानमन्त्रीं अन नेपाली पुजारी नियुक्त याःगु खःसा थुकथंया विवाद मवये माःगु खः । थुकियात माओवादीं थःगु शक्ति छ्यःगु कथं थुइकाः विवाद ब्वलंकेगु उचित मखु ।

अथे ला पशुपतिनाथ सुधार व मन्दिरया खँय् संस्कृति तथा राज्य पुनस्रंरचना मन्त्री व कोषया अध्यक्ष गोपाल किराँतीं जानकारी बियादी कथं थुगु ज्या भारतीय पुजारीया राजीनामा व नेपाली पुजारीया नियुक्ति लिपा खनेदुगु थीथी भ्रमयात निवारणया निंतिं नं खः ।

हिन्दू मात्रया आराध्यदेव श्री पशुपतिनाथया पुजारी नेपाली हे जुइमाःगु खँय् निगू मत मदु । अथे खःसां थुकी आस्था परम्परा धार्मिक विधिया खँ जक मखु नेपाः व भारतया धार्मिक स्वापू तकं स्वानाच्वंगु कारणं थुकियात हचुवा कथं काये मजिउ । थुगु ज्यां नेपाः वा भारतया धार्मिक स्वापू स्यन धाःसा नेपाःया धार्मिक सहिष्णुताय् नं लिच्वः लाकी । किरातकालंनिसें पशुपति महाद्यःयाथाय् भट्ट जुयाः पुजा आजा याना वयाच्वंगु धइगु छुं कारण हे मदयेकं खइ मखु । थुकिं निगू देय्या स्वापूयात तकं धार्मिक आस्थां बल्लाका च्वंगु दु । हाकनं धार्मिक आस्थायात सुनानं काचाक्क त्वःते फइ नं मखु । उकिं थुखे पाखे नं सकसियां बिचाः यायेमाः ।

भगवान पशुपतिनाथया पुजारी आः उप्रान्त नेपाली ब्राम्हण हे जुइ धकाः पशुपति विकास कोषं निर्णय याःबलय् थुकियात विश्व हिन्दू महासंघं नं 'ईयात ल्वःगु निर्णय' धकाः धन्यवाद ज्ञापन याःगु खः । समितिया अध्यक्ष दामोदर गौतमं धयादी कथं पशुपतिइ नेपाली पुरोहित तयेमाः धकाः २०४८ सालपाखे हे तत्कालिन प्रधानमन्त्री गिरिजा प्रसाद कोइरालायाथाय् प्रस्ताव यंकूगु खः । उकी कोइराला नं सहमत जुयादी धुंकूगु खः । तर उगु इलय् पशुपति विकास कोषया अध्यक्ष जुयाच्वंम्ह लानि ऐश्वर्यं राज्यलक्ष्मी देवीं उगु खँयात स्वीकृति मबीवं उगु प्रस्ताव थातिं लाःवन । आः नं पुलांम्ह जुजु ज्ञानेन्द्रं छगू वक्तब्य हे पिकासें हिन्दू मात्रया आस्थाया क्षेत्र जुयाच्वंगु पशुपतिनाथया पुजारी नियुक्तया खँय् विवाद न्यंके मजिउ
धकाः राय बियादीगु दु ।

खय्त ला पशुपति देगलय् दुने नेपाली पुजारी तल धाःसा पशुपित महाद्यःयात भेटी वइगु व अन्य धनद्रब्य नेपालय् हे च्वनीगु खँय् विवाद मदु । अथे खःसां थन मात्र पुजा आजा व भेटीया जक खँ मखुसें पशुपति क्षेत्र व पशुपति महाद्यःनापं स्वानाच्वंगु फुक्कं खँत धार्मिक आस्था संस्कृति नापं नं स्वापू
दुगु खँ जुल । उकिं द्यः देवीया पुजा आजाया खँय् सः सिउपिं व ‌योग्यिपं ब्यक्ति हे लाना च्वने माःगु खँय् नं ध्यान तयेमाः । पशुपित महाद्यःया पुजा मेमेगु पुजा थें साधारण कथं काये मजिउ । थुगु पुजा न्हिथं हे नीसी यासें पूर्ण धार्मिक विधि कथं सम्पन्न यायेमाः । थनया पुजारी धइम्ह ब्रम्हनिष्ठम्ह योग्य व्यक्ति नापं आगम व निगमया निगुलिं शास्त्र सिउम्ह शैव शास्त्रीय ज्ञान दुम्ह कर्मकाण्डय् पूर्ण ज्ञान व निष्ठा दुम्ह जुइमाः । पशुपित देगलय् दुने दुहां वइगु आम्दानी सुरक्षित जुइमाः । थुकी पशुपित विकास कोषं पुजारीपिंत माःगु ब्यवस्था याना बीमाः । नापं लिपा थज्याःगु विवादं नं मुक्त जइमाः ।<

More Stories Like this