बस दुर्घटनाय् न्हय्म्ह सित
सीपिं फुक्कं स्वनिगःयापिं, स्वीन्याम्ह घापाः
येँ (सन्ध्या टाइम्स)/मुग्लिन नारायणगढ सतक खण्डय् लाःगु चितवनया जलविरेय् तीर्थयात्री ज्वना वंगु छगः बस दुर्घटना जुयाः उकी च्वना वंपिं न्हय्म्ह यात्रु सीगु दुसा स्वीन्याम्ह घाःपाः जूगु दु ।
वंगु चान्हय् जूगु उगु दुर्घटनाय् लानाः किपूया न्याम्ह, ख्वपया छम्ह व येँ मातातिर्थया छम्ह सीगु खः।
उगु दुर्घटनाय् लानाः किपूया २७ दँ दुम्ह कृष्ण बास्कोटा, प्यदँ दुम्ह शुभेच्छा बास्कोटा, ५० दँ दुम्ह रामबाबु बास्कोटा, ४५ दँ दुम्ह लक्ष्मी खनाल व ३० दँ दुम्ह रेखा खनाल सीगु खः। अथे हे ख्वपया ३५ दँ दुम्ह विष्णु प्रजापति व मातातीर्थया ७० दँ दुम्ह रामचन्द्र रिजाल सीगु खँ चितवन प्रहरीं धाःगु दु। प्रजापति घटनास्थलय् हे सीगु खःसा मेपिं भरतपुर अस्पतालय् वासः याकुयाकुं सीगु खः।
येँनं सुनसरीया धार्मिकस्थल बराह क्षेत्रय् तीर्थ यात्राय् वनाच्वंगु बा. २ ख ६२७१ नम्बरया बस वंगु चान्हय् १२ बजे चितवनया चण्डीभन्ञ्याङ जलविरे लागाय् १०० मिटर क्वय् त्रिशुली खुसिइ कुतुंवनाः उगु दुर्घटना जूगु खः। उगु बसय् ४३ म्ह यात्रु दुगु खः। घाःपाः जूपिंत आः भरतपुरया थीथी अस्पतालय् तयाः वासः याकातःगु खँ धाःगु दु। अप्वः घाइतेया अवस्था गम्भीर दु ।
चाबहिली गाडीं क्यलाः मचा सित
येँ (सन्ध्या टाइम्स)/चाबही लागाय् थौं सुथय् छगू गाडी दुर्घटनाय् लानाः छम्ह मचा सीगु दु। उगु लागाय् चले याइगु गाडीं क्यलाः मचा बांमलाक घाःपाः जूगु खःसा लिपा वासः याकेत अस्पताल यंकूबलय् अन वासः याकुयाकुं मचा सीगु खँ धाःगु दु। गाडीं क्यलाः मचा सीवं स्थानीय जनतां अन गाडीइ तोडफोड शुरु याःगु दुसा थुकिं यानाः उगु लागाय् यातायात अवरुद्ध जूगु दु। विद्यार्थीतय्सं चाबही लागाय् छुं हे सवारी चले मयाकुसे चक्का जाम याना बिउगुलिं उगु लँपु जुयाः वयेमाःगु गाडीत मेथासं चाःहीकाः यंकेमाःगु खः।
उखे म्हिगः येँया ठमेलय् च्वंगु सनराइज मनि एक्सचेन्जय् निम्ह लुटेरातय्सं गोलीं कयेकाः ध्यबा लुटे यानाः यंकूगु दु। बैंकं ध्यबा कयाः वयाच्वंम्ह संचालक नन्दबहादुर श्रेष्ठयात उमिसं खुकुरीं पालाः १६ लाख तका लुटे याःगु खः। लुटेरातय्सं थःपिनि मोटरसाइकल धाःसा अशोकगल्लिइ तुं त्वःता थकूगु दु ।
