गभर्नरय् नं तानातान
सिफारिस समितिया बैठकं छुं निर्णय याये मफुत
गभर्नर मदयाः राष्ट्र बैंक भद्रगोल / आर्थिक दुर्घटना जुइफुगु आशंका
येँ (सन्ध्या टाइम्स)/नेपाल राष्ट्र बैंकया न्हूम्ह गभर्नरया लागिं नां सिफारिस यायेत गठन याःगु समितिया म्हीग च्वंगु न्हापांगु बैठक छुं हे निर्णय मयासे क्वचाल। न्हूम्ह गभर्नरया लागिं वयाच्वंगु थीथी नां मध्ये स्वम्हेसिया नां सिफारिस यायेगु ज्या उगु समितिं याइ। सरकारं उकी मध्ये छम्हेसित गभर्नर नियुक्त याइ ।
तर गभर्नर पदया लागिं राजनीतिक पार्टीतय् दथुइ तानातान जुयाच्वंगुलिं समितिं आः तक नां सिफारिस याये मफयाच्वंगु खँ धाःगु दु। सूत्रया कथं समिति पिने जक क्यनाः अन्ततः गभर्नरया नां नं उच्चस्तरीय राजनीतिक संयन्त्रपाखें हे पिहां वइगु सम्भावना दु। संयन्त्रं गभर्नरया नां सिफारिस याइगु जूगुलिं उकी कांग्रेस व एमाले जक मखु माओवादी नं रेसय् दुगु खँ धाःगु दु ।
सामान्यतया पुलांम्ह गभर्नरं अवकास काइगु ई स्वयां न्ह्यः हे न्हूम्ह गभर्नर नियुक्त यानाः ज्या शुरु याकीगु चलन दुगु खः। तर थुगुसी धाःसा पुलांम्ह गर्भनर विजयनाथ भट्टराई विदाय् च्वनेधुंकाः नं न्हूम्ह गभर्नर नियुक्तिया ज्या धाःसा जुइ फयाच्वंगु मदुनि ।
थौंकन्हय् देय्या अवस्था तसकं जटिल जुयाच्वंगु व वित्तीय संकट समेत वयाच्वंगु इलय् राष्ट्र बैंक गभर्नरविहिन जुयाच्वंगुलिं छुं नं इलय् तःधंगु आर्थिक दुर्घटना जुइफुगु खँ विज्ञतय्सं धाःगु दु। थौंकन्हय् गभर्नर समेत च्वनाः हरेक वालय् वित्तीय विश्लेषण यानाः न्हून्हूगु नीति दयेका च्वनेमाःगु इलय् सरकारं गभर्नर नियुक्त मयाःगु कारणं राष्ट्र बैंकयात ज्या यायेत हे थाकुयाच्वंगु खँ नं सूत्रं धाःगु दु।
चुपचाप डेपुटी
न्हूम्ह गभर्नरया लागिं तीव्र दौडधुप जुयाच्वंगु इलय् नं डेपुटी गभर्नर कृष्णबहादुर मानन्धर धाःसा गनं नं छुं धाः मवँसे चुपचाप च्वनादीगु दु। निक्वः निक्वः तक कामु गभर्नर जुयाः ज्या यायेधुंकूम्ह वय्कःयात हे गभर्नर दयेकूसा विवाद मवइगु खँ अर्थविद्तय्सं धयाहःगु दु। तर वय्कः गुगुं नं राजनीतिक पार्टीलिसे आवद्ध मजूगु कारणं वय्कःपाखे सुनां नं मिखा मब्वःगु खँ सूत्रं धाःगु दु। पार्टी आवद्ध मखुसा सुनां नं वास्ता मयाइगु प्रवृत्तिया वय्कःया दसु जूगु दु ।
