उपराष्ट्रपतिया सपथ आः छु भासं ?

अन्तरिम संविधानय् जूगु लिपांगु संशोधन कथं आः न्ह्याम्हेस्यां नं थःथःगु मांभासं सपथ ग्रहण याये फइगु जूगु दु। थ्व अवस्थाय् आः निष्त्रि्कय जुयाच्वंम्ह उपराष्ट्रपति परमानन्द झां पुनः सपथ ग्रहण यानादीबलय् छु भासं यानादी धइगु उत्सुकता मातृभाषाया आन्दोलनकारीतय् दथुइ ब्वलनाच्वंगु दु। खास यानाः वय्कलं आः हानं सपथ ग्रहण यानादीबलय् खय् भासं हे यानादी धइगु खँ पिहां वयाच्वंगु कारणं थ्व कौतुहलता ब्वलंगु खः। वय्कःया हे कारणं थौं संविधान हे संशोधन यानाः मांभासं नं सपथ ग्रहण याये दइगु थ्व उपलब्धी चूलाःगु खः। तर वय्कलं अज्याःगु अधिकार प्राप्त जुइधुंकाः उकियात उपयोग मयासे हानं खय् भासं सपथ ग्रहण यात धाःसा उकिं प्राप्त जूगु अधिकारया उपहास जक जुइगु मखु वय्कलं खय् भासं सपथ काये मखु धकाः क्यनादीगु अडान नं अर्थहिन जू वनीगु निश्चित दु।
वय्कःया मांभाय् मैथिली खः। उकिं वय्कःयात मैथिली भासं हे सपथ ग्रहण यायेमाली धकाः मैथिल समाजं आग्रह यानाच्वंगु दु। वय्कः आवद्ध जूगु मधेशी जनअधिकार फोरमं वय्कःयात हिन्दी भासं सपथ कायेत दवाव बियाच्वंगु दु। उखे राष्ट्रपतिंनिसें कयाः प्रधानमन्त्री मन्त्रीतय्सं धाःसा वय्कःयात खय् भासं सपथ कायेत इनाप यानाच्वंगु दु। थ्व ल्याखं वय्कः छगू तःधंगु हे द्विविधाय् लानाच्वंगु दयेमाः। तर संविधान संशोधन जुयाः वय्कःया कारणं प्राप्त जूगु अधिकार धइगु मांभासं सपथ ग्रहण यायेगु खः। उकिं वय्कलं थःगु हे संघर्षं प्राप्त जूगु अधिकारया सम्मान व संरक्षण यायेगु खःसा थःगु हे मांभासं सपथ ग्रहण यायेगु दकलय् न्यायपूर्ण जुइ ।

More Stories Like this