हानं छक्वः बेष्ट एक्टर

नेपालभाषाया बाःछिपौ पेज थ्री पिपुल्स च्वाइस अवार्ड - ११३० या 'बेष्ट एक्टर' या सिरपाः नांजाःम्ह कलाकार आशाकाजी थकुयात लाःगु दु। सर्वसाधारणपाखें एसएमएस, नेट व पत्रिकाय् पिहां वःगु फाराम मार्फत वःगु भोटिङ्गया लिधंसाय् उगु एवार्ड लाःगु खः ।

खतुं वय्कः अवार्ड लायेवं जक बेष्ट एक्टर जूम्ह धाःसा मखु। न्ह्यागु हे भूमिकाय् नं उलि हे सशक्त अभिनय यानाः क्यनेगु क्षमता दुम्ह वय्कः नेपालभाषा ख्यालः व फिल्म ख्यःया धाथेंयाम्ह हे बेष्ट एक्टर खः ।

थौं स्वयां स्वीन्यादँ न्ह्यः हे वय्कः रामशेखर नकःमिं च्वयादीगु 'बःजुया लिलाम' नांगु ख्यालः म्हिताः ख्वपय् बेष्ट एक्टरया सिरपाः त्याकादीधुंकूम्ह कलाकार खः। छम्ह हास्य पात्रयाके दयेमाःगु फुक्कं गुण वय्कःयाके दु। रामशेखर नकःमिया उगु 'बःजुया लिलाम' ख्यालः मार्फत हे वय्कः कलाकारिता ख्यलय् प्रवेश जुयादीगु खः। उगु ख्यालः कासाय् थःत लाःगु बेष्ट एक्टर सिरपालं उत्साहित जुयाः हे आः तकंथ्व ख्यलय् निरन्तर लगे जुयाच्वनागु खँ वय्कलं कनादी ।

नेपालभाषा ख्यालः ख्यलय् वय्कः ज्वः मदुम्ह कलाकार ला ख हे खः, लिपा फिल्म दयेकेगु शुरु जूबलय् उकी नं वय्कलं उलि हे उत्कृष्ट अभिनय क्यनादीगु दु। मह सञ्चारपाखें दयेकूगु 'लक्ष्मी', 'डकर्मि' आदि टेलिप्याखनय् नं वय्कलं म्हितादीगु खः ।

ख्वप नगरपालिका वडा नं.३ तचपाः त्वाःया मिलाक्वःछेँय् जन्म जुयादीम्ह वय्कः मां आशामाया थकु व अबु भैरवसिंह थकुया काय् खः। च्वथ्यंक ब्वने मखंसां अन्तर्राष्ट्रिय गैरसरकारी संस्था इसिमोडय् डिजाइन आर्टिस्ट कथं लजगाः यानादीम्ह वय्कःयात चित्रकारिता समेत सःम्ह डिजायनर सिबें नं ख्यालः व फिल्म कलाकार कथं अप्वःस्यां म्हसिउ। इसिमोडय् वय्कः कार्टोग्राफर खः ।

थौंकन्हय् ख्यालिगुलु गुथिया न्वकु जुयाच्वनादीम्ह वय्कः थुगुसी नेपालभाषा पिपुल्स च्वाइस अवार्ड प्राप्त जुइधुंकाः थःत अप्वः जिम्मेवारी वःगु व आः मेगु फिल्म म्हितेगु इलय् ग्यसुलाःगु भूमिकाय् जक म्हितेमाली धइगु भावना थःके वःगु खँ कनादी। थ्व सिरपाः लाःगु इलय् वय्कलं थःत कला क्षेत्रय् हःपिं रामशेखर नकःमि व मदुम्ह कृष्ण नापितयात दकलय् अप्वः लुमंकादीगु दु। ख्वपय् न्हापा ख्यालः ज्याझ्वः जुइबलय् थ्व स्वम्हेसिया टीम सदां उत्कृष्ट जुइगु खः। लिसें वय्कलं थःत सदां हःपाः बीपिं ख्वपया दर्शक व ख्वप नगरपालिकायात नं थ्व लसताय् सुभाय् बियादीगु दु। वय्कः ख्वप नगरपालिकां दयेकूगु 'झ्वकमनीम्ह', 'न्हिसुतु' थेंज्याःगु 'हिट' फिल्मय् नं म्हितादीगु खः ।

More Stories Like this