राजनीतिक संयन्त्र व सरकारया कचवं
उच्चस्तरीय राजनीतिक संयन्त्र दुने सरकार परिवर्तनया प्रस्ताव दुहां वनेवं देशय् हानं छक्वः सत्ता समीकरणया कासा न्ह्याइगु जूगु दु। देशय् ब्वलनीगु छुं नं कथंया राजनीतिक संकट समाधान यायेगु लागिं धकाः गठन जूगु उगु संयन्त्रय् विपक्षी पार्टी एनेकपा (माओवादीं) वर्तमान सरकार परिवर्तन यानाः राष्ट्रिय सरकार गठन यायेमाःगु प्रस्ताव तयेवं देशय् थ्व सरगर्मी शुरु जूगु खः। लिसें संयन्त्रय् सरकार परिवर्तनया खँ प्रवेश जुइवं उगु हे संयन्त्रया आमन्त्रित दुजः एवं प्रधानमन्त्री माधव नेपालं नं थः उगु संयन्त्रया बैठकय् गबलें नं मवनेगु घोषणा उपप्रधानमन्त्री विजय गच्छेदार मार्फत यानादीगु दु। थुकिं यानाः सरकार व राजनीतिक संयन्त्र दथुया स्वापू अथें हे स्यंगु दुसा आः संयन्त्रपाखें बीगु छुं नं कथंया निर्देशन थ्व सरकारं पालना याइगु खः लाकि मखु धइगु शंका नं पिहां वःगु दु ।
संयन्त्रया ज्या सरकार बांलाक चले याकाः संविधान निर्माणया ज्यायात सहज यायेगु खः। तर संविधान दयेकेगु ज्यायात सहज यायेगु खःसा दकलय् न्हापां वर्तमान सरकार हे हिलेमाः धइगु माओवादीया दावी दु। छाय्धाःसां थ्व सरकारं न राष्ट्रपतिया असंवैधानिक पलाःयात संवोधन यायेगु छुं ज्या यात, न सेना समायोजनया ज्या न्ह्यःने न्ह्याकल बरु अःखतं सेना समायोजन हे जुइ मखु धकाः न्ववाइपिंत रक्षा मन्त्री दयेकाः तयातःगु दु। थज्याःगु तर्क न्ह्यःने तसें माओवादीं न्ह्यब्वःगु सरकार परिवर्तनया थ्व प्रस्तावं देशय् हानं छक्वः सभासदतय् खरिद-बिक्री शुरु यानाः राजनीतिक हलचल हया बीगु खः लाकि धइगु सहज अनमान याका बिउगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
