उत्कृष्ट मिसा कलाकार भिंतुना जोशी

थुगुसी पेज थ्री नेपालभाषा बाःछिपौ पाखें याःगु थीथी अवार्ड घोषणाय् उत्कृष्ट कलाकार कथं भिन्तुना जोशीयात ल्यःगु दु। 'यांमिखा' नेपालभाषा संकिपा मार्फत स्वकुमितय् मिखाय् ग्यसुलाक दुहां झाःम्ह वय्कः म्हो इलय् हे नेपालभाषाय् चर्चित कलाकार कथं स्थापित जुयादीम्ह खः। विशेष यानाः रवि डंगोलं दयेकादीगु उगु संकिपाय् मू नायिकाया भूमिकाय् सशक्त अभिनय यानादीम्ह वय्कःयात वयां लिपा आपालं म्युजिक भिडियोय् म्हितेगु ह्वःताः चूलाःगु खः ।

चर्चा लिपा जक जूगु खःसां वय्कलं थःगु कलाकारिताया क्यारियर धाःसा स्कुल जीवनंनिसें हे शुरु यानादीगु जुयाच्वन ।

देय्या नांजाःम्ह गायक द्वारिकालाल जोशी व नगिना जोशीया कान्छिम्ह म्ह्याय् मय्जु भिंतुना थुगु अवार्ड काये खनाः अतिकं लय्ताः। सिरपाः लायेधुंकाः वय्कःयात बधाई व सुभाय् बीपिनि झ्वः हे लगे जुल। प्रत्यक्ष नापलानाः जक मखु फोन, ईमेल, एसएमपाखें नं। फेस बूकय् वःगु बधाईया ला खँ हे ल्हाये म्वाःल। बधाई बीपिंत लिसः बिबिउँ हे छवाः वंगु वय्कःया होश मदु ।

भिंतुनाया पृष्ठभूमि स्वयेगु खःसा वय्कःया पूरा परिवार हे सांगीतिक खनेदु। अबु द्वारिकालाल जोशी नेपाःया हे नांजाःम्ह गायक, मां नगिना जोशी नांजाःम्ह गायिका नापं कलाकार, पाजु न्ह्यू बज्राचार्य नांजाःम्ह संगीतकार, तता लसता जोशी नं नांजाःम्ह गायिका। परिवारया थ्व पृष्ठभूमियात कयाः वय्कलं धयादी, 'जि ला परवारया प्रेरणां हे थ्व ख्यलय् वयाम्ह खः ।'

वय्कः प्यंगू तगिमय् ब्वनाच्वंगु इलय् हे 'म पनि स्कुल जान्छु' धइगु शैक्षिक विज्ञापनय् म्हितादीगु खः। कला ख्यलय् थ्वहे वय्कःया न्हापांगु 'डेबु' धाःसां जिउ।
कला ख्यलय् तता लसता थें भिंतुना म्येँ हाले सःम्ह ला मखु अथे खःसां 'अग्नि' नांगु लसताया अल्बमय् भिंतुनां नं छपु म्येँ हालेगु ह्वःताः धाःसा चूलाकूगु दु। अथे खःसां भिंतुनायाके फिल्म व म्युजिक भिडियो यायां हे फुर्सद दुगु मखु।
सिद्धिगणेश माविइ स्कूल शिक्षा कयादीम्ह भिंतुना जोशीं मेगु थप अध्ययनया झ्वलय् आईए तक ब्वनाः 'ब्रेक' यानादीगु खः ।

रवि डंगोलया 'यांमिखा' लिपा सुरेश बज्राचार्यया 'इहिपाः' या लागिं वय्कःयात मू भूमिकाय् म्हितेत इनाप वयाच्वंगु दु। २०३९ साल भाद्र १७ गते येँय् बूम्ह वय्कः छगू इलय् दोहरी ज्याझ्वः व मिक्वाः ज्याझ्वः मार्फत इमेज च्यानलय् नं खने दयेकादीगु खः ।

थम्हं थ्व ख्यलय् आः तक याना वयागु योगदानया कदर यानाः हे स्वकुमितय्सं थःत भोट बियाः पेज थ्री अवार्डया हकदार दयेका बिउगु भिंतुनाया बिचाः दु ।

More Stories Like this