समायोजनया जिम्मा संयन्त्रयात
संयन्त्रय् प्रस्ताव यंकेगु जिम्मा प्रधानमन्त्रीयात
विशेष समिति बैठकया निर्णय /संख्या व मापदण्ड तोके यायेत इनाप
येँ (सन्ध्या टाइम्स)/माओवादी लडाकुयात गन गन गुलि ल्याखय् समायोजन यायेगु व उकिया मापदण्ड छु छु जुइमाः धइगु खँ उच्चस्तरीय राजनीतिक संयन्त्र मार्फत किटान याना हजि धकाः प्रधानमन्त्री माधव नेपालयात जिम्मा बिउगु दु। थौं सुथय् च्वंगु सेना समायोजन विशेष समितिया बैठकं प्रम नेपालयात थ्व जिम्मा बिउगु खः। प्रम नेपाल थः हे उगु विशेष समितिया अध्यक्ष खः ।
सेना समायोजनया ज्यायात न्ह्यःने न्ह्याकेगु लागिं माओवादी लडाकुतय्त नेपाली सेना लगायत थीथी सुरक्षा निकायय् समावेश याना यंकेगु खँ न्ह्यःने वयाच्वंगु दु। उकी मध्ये आः छु छु सुरक्षा निकायय् गुलि गुलि लडाकुत समायोजन यायेगु खः उकिया संख्या तोके यायेगु व अन नियुक्त यायेत माःगु मापदण्ड छु छु खः व नं निर्धारण यायेगु जिम्मा उच्चस्तरीय संयन्त्रयात बीगु निर्णय थौं जूगु खः। अले थ्व प्रस्ताव संयन्त्रय् पेश यायेगु जिम्मा प्रधानमन्त्री एवं संयन्त्रया आमन्त्रित दुजः माधव नेपालयात हे बिउगु दु ।
लुमंकेबहः जू, प्रम नेपालं थःत आमन्त्रित दुजः जक दयेकूगु व सरकार परिवर्तन बारे सहलह याःगु धइगु दोष क्यनाः संयन्त्रया बैठकय् थः उपस्थित मजुइगु 'निर्णय' याना तःगु दु। आः तक वय्कः उकिया बैठकय् सहभागी नं जुयादीगु मदु। वय्कः वने हे मखु धकाः च्वनाच्वंगु संयन्त्रय् हे सेना समायोजन सम्बन्धी प्रस्ताव तयादिसँ धकाः वय्कःयात हे जिम्मा बिउगुलिं थुकी नं गनं वय्कःयात बाम्हय् काकेगु राजनीति जुयाच्वंगु खः ला धइगु आशंका थन यानाहःगु दु।
उच्चस्तरीय संयन्त्र भंग या: गच्छदार
उच्चस्तरीय राजनीतिक संयन्त्र थौंकन्हय् सरकार परिवर्तन यायेगु खेलय् लगे जूगु द्वपं बिसें उपप्रधानमन्त्री विजय गच्छदारं उगु संयन्त्र हे भंग यायेमाः धकाः माग यानादीगु दु।
थौं विराटनगरय् स्थानीय सञ्चारकर्मीतलिसे खँ ल्हासें वय्कलं थ्व माग यानादीगु खः। संयन्त्रय् प्रधानमन्त्रीयात आमन्त्रित दुजःया रुपय् जक तःगु व संयन्त्र सरकार हिलेगु खेलय् लगे जूगुलिं थ्व निकाय भंग यायेमाःगु बिचाः वय्कलं प्वंकादीगु खः।
