सरकार-संयन्त्र तनाव
संयन्त्र सरकार क्वःथलेगु ज्याय् लगे जूगु द्वपं
प्रम नेपाल बैठकय् मवं
सुजाताया धापू हे गिरिजाया धापू
येँ (सन्ध्या टाइम्स)/सत्ता सञ्चालन व संविधान निर्माणया ज्याय् ग्वाहालि जुइमा धकाः दयेकूगु उच्चस्तरीय राजनीतिक संयन्त्र व सरकार दथुइ तनाव सिर्जना जूगु दु। थ्व आयोग दयेकेवं हे सरकार हिलेगु चर्चा नं पिहां वयेवं संयन्त्र व सरकार दथुइ थ्व तनाव ब्वलंगु खः ।
संयन्त्रय् प्रधानमन्त्री माधव नेपालयात आमन्त्रित दुजःया रुपय् दुथ्याकूगु खःसां वय्कः आः तक छक्वः नं संयन्त्रया बैठकय् उपस्थित धाःसा जुयादीगु मदुनि। थुकिं यानाः तनावयात अझ ग्वाकेगु ज्या जूगु दु। थ्वहे झ्वलय् सरकारय् हे दुथ्याःम्ह उपप्रधानमन्त्री एवं नेपाली कांग्रेसया सभापति गिरिजाप्रसाद कोइरालाया म्ह्याय् मय्जु सुजाता कोइरालां थ्व सरकारया नेतृत्व हिले माल धकाः न्ववानादीगु कारणं संयन्त्र व सरकारया थ्व तनाव अझ तब्या जुया वंगु खँ धाःगु दु ।
संयन्त्रया स्वम्ह शीर्षस्थ नेतात मध्ये माओवादी अध्यक्ष प्रचण्ड ला न्हापांनिसें हे सरकार हिले माल धकाः माग यानाच्वंम्ह जुल। एमाले अध्यक्ष झलनाथ खनालं थःगु पार्टीइ हे सरकार त्वःताः त्यागया नमूना ब्वयेमाः धकाः बिचाः तयादीगु खः। आः ल्यं दनिम्ह कोइरालाया बिचाः छु खः धइगु सी मदुनिगु खःसां वय्कःया हे म्ह्याय् सुजाता कोइरालां नकतिनि बुटवलय् सरकारया नेतृत्व हिले माल धकाः बियादीगु अभिव्यक्ति हे सभापति कोइरालाया नं बिचाः जुइमाः धइगु अनुमान थन जुयाच्वंगु दु। माधव नेपालया सरकार वनी कि च्वनी धइगु खँ एमालें हे याइगु संस्थागत निर्णयय् निर्भर जुइ धकाः कोइरालां न्ववानादीधुंकूगु दु। एमालेया संस्थागत पदाधिकारी धइम्ह अध्यक्ष झलनाथ खनाल हे खः ।
थुकथं संयन्त्रया निर्माणं सरकारयात अस्थिर याना बीगु खः लाकि धकाः प्रधानमन्त्रीपाखें न्हापा हे यानाच्वंगु आशंका आः वयाः सत्य साबित जुइगु खः लाकि धइगु खँ नं थन पिहां वःगु दु। सूत्रं धाः कथं संयन्त्रं थौंकन्हय् मेमेगु ज्या न्ह्याकेगु सिबें नं सरकार हिलेगु बारे विशेष रुपं खँ ब्याकाच्वंगु दु। यदि संविधान इलय् दयेकेगु व सत्ता नं बांलाक सञ्चालन यायेगु खःसा वर्तमान सरकारया नेतृत्व परिवर्तन हे मू ज्या जुइमाः धइगु विश्लेषण माओवादीं संयन्त्रया बैठकय् पेश यानाच्वंगु खँ नं धाःगु दु ।
