जिज्ञासाया गथः भचा ब्यं थें जुइ

नर्मदेश्वर प्रधान

नुगलय् अनेक जिज्ञासा लुयाच्वनी। लँपु सुगम जूसा जिज्ञासात शान्त जुइ। शान्त यायेफइ। थाकुइ मखु। तर गुलिखे जिज्ञासा शान्त याये फइ मखु। थाकुइ। उकुसमुकुस जुयाः ल्यना हे च्वनी। नुगलय् थानाच्वनी। जिज्ञासातसें न्ह्याबलें समाधानया उपाय पियाच्वनी। अवसरत स्वयाच्वनी। थन जिं बिस्कं कथंया जिज्ञासा न्ह्यथने। थ्व जिगु निजी जिज्ञासा जक मखयेफु। यक्वसिया जिज्ञासा जुइफु थ्व। थ्व जिज्ञासाया विषयय् यक्वस्यां बिचाः याइ जुइमाः। अनुमान, तर्क न्हयाकू जुइमाः। गुगु जिज्ञासाया विषय थन जिं तर्क याये, चिउताः क्यने थुकी यक्वस्यां न्ह्यसः घाना वइ। नुगःया खुल्दुली दइ ।

तर्क, अनुमानत ला जुयाच्वनी नुगलय् थुज्वःगु विषयय्। कल्पनां अनेक आकार कयाच्वनी। च्वःप्वः मदयेक खँत लुयाच्वनी। प्रत्यक्ष अनुभवया खँ जुइ मखु। थ्व थथे हे खः। थथे हे जुइ। तप्यंक धाये फइगु मखु। दावा याये फइ मखु। सम्बन्धित मनूतलिसे स्वापू तयाः न्यनेकने याये। व नं उलि अःपुगु खँ मखु। स्वइके न्यने? छु धकाः न्यने? गय् खँ न्ह्यथने? हिचकिचाहट जुइ। थ्व स्वाभाविक खः। का म्वाःल धाये। कस्से जुयाः न्यनां त्वःते। न्यने। धाइम्हं लिसः बिउसा ला खः? मबिउसा छु याये? मछाः मछिं तायेकाः चिलावंसा छु याये? छिमित छाय् धकाः हक्का हःसा छु याये? न्यनेत तयार जुइ। म्हुतुं लिसः पिकाये मफुसा जिज्ञासा गय् लंके? सिउ लँ अःपु मजू। अय्नं सीके मास्ते वइ धात्थें छु खः। उले मास्ते वइ। अन्दाज ला जुइ याये मफइगु मखु। अनुमान अन्दाजं जक मन लुधंकां मगाः। खःगु खँ हे चूलाके दुसा विश्वसनीय जुइ। थौंया वैज्ञानिक युगय् ।

उमेर वनेधुंकूपिनि जीवनी ब्यने यः। मनूतसें धायेफु जीवनीइ निजात्मक खँ जक दइ। कर्पिनी जीवनी स्वयां छु दइ? तर दः अथे मताः। स्वइगुं जीवनी नं गैर निजी खँत यक्व दइ। जीवन, समाज, युगया जिज्ञासातय् गथः फ्यनेत मनूतय् जीवनीं ग्वाहालि याइ। जीवनी ब्वनेगु सुयां व्यक्तिगत खँया चिवा चर्चा यायेगु जुइ मखु। तत्कालिक समय, युगया किचः दइ। मानवीय स्वभाव, मनोविज्ञानया सत्य तथ्य अन खंकेफइ। जीवनी ब्वनेगु ज्ञानवर्द्धक जुइ। जीवनी हे जुइमाः धइगु मदु। वृद्धवृद्धातलिसे काइगु अन्तर्वार्तां नं यक्व जिज्ञासातय्त सन्तुष्ट बी। इमिगु अनुभव ब्वनाः, न्यनाः ज्ञां तफाः यायेफइ ।

तप्यंक वनाः स्वइके न्यनेगु? प्रत्यक्ष संवाद याये जिज्ञासाया लिसः लुइके। थथे याये दःसा ला जिउगु खः। तर सम्भव जुइ मखु। अन्तर्वार्तात स्वये। ब्वने। न्यने। लेख, रचनात स्वये। जिगु जिज्ञासा विषय छुं दइ ला? माले। लुइकेत स्वये। वय्कःपिनि अन्तर्वार्ता, लेख, रचना ब्वने। थ्व विषयय् छुं जः ह्वःगु अनुभव जुइ। वय्कःपिं फुक्कं चय्दँ पुलेधुंकूपिं। नांजाःपिं। वय्कःपिनि अनुभवं जिगु जिज्ञासा छुं भति राहत अनुभव याइ ।

थन जिगु जिज्ञासाया विषय जुइ ज्याथःपिनि सेक्स लाइफ। गुलिस्यां धाइ बुरात ल्याय्म्हत स्वयां नं कामुक जुइ। बस, लँय् हुलमुलय् बुरातपाखें बचे जुइमाः। बुरा जुइवं गन खतराविहीन जुइ? इपिं झं बदमास जुइयः। मौका लातकि...। मिसा मय्जुपिंसं बुरातय्त कयाः थथे धाःगु जिं ताः। बुरातय्गु सेक्स मनोविज्ञान गय् जुइ? थुज्वःगु टिप्पणी छुं भति संकेत याइ। थ्वया अर्थ वृद्धजन फुक्क यौन हिंस्रक जुइ। थथे धाये फइ मखु। धाये जी मखु। मेखेर यौन विशेषज्ञतसें धाइ बैंस वनेधुंकूपिनि यौन शक्ति कमजोर जुइधुंकी। शरीर शिथिल जुइ। रासायनिक दृष्टिं वृद्धजनतय् यौन रङ्गहीन, फिक्का जुइ। खालि लः लः जुइधुंकी। इमिगु स्पर्शं यौनिक प्रभाव लाके फइ मखु। थने फइ मखु। प्रभावहीन जुइ। जिज्ञासा लुइ। वृद्धतसें सुं मिसातय्त थिउसा व यौनहिंसा जुइ ला मजुइ ला ?

रासायनिक दृष्टिं इमिगु स्पर्श प्रभावहीन जुइधुंकी। यौन तरङ्ग उकिं थने फइ मखु। थ्व शरीर रसायन विज्ञानं धाइ। वृद्धतय् थुज्वःगु शिथिल यौन रसायन स्थितियात छु गथे खंकेगु? कानूनं थ्वइत छु दृष्टिकोणं स्वइ स्वयेमाः। जिज्ञासाया खँ जुइ। यौनसेल्स (कोष) कमजोर जुयाः, यौन रसायनविहीन जुइधुंकूपिं ज्याथःतय् यौनिक कुतःयात यौन अपराध धायेफइ वा मफइ? वृद्धजनतय् स्पर्श विद्युतीय तरङ्ग मदुगु तार जक खः। यौन रसायन शास्त्रं धाइ। तार नाङ्गा जुइफु। उकी करेन्ट मदुसा थ्वं स्वइतं आघात याये फइ मखु। छुं हानी वं याये फइ मखु। वृद्धतय् यौन हिंसायात अपराध शास्त्रं गय् स्वइ? युवातय् यौन हिंसा थें व उतिकं हे दण्डनीय जुइ? घृणित जुइ ला? वा क्षम्य जुइ? सह्य खंकेमाः।
नेता कृष्णप्रसाद भट्टराईनं इलय् ब्यलय् स्पष्टीकरण बी। 'सनेमफुम्ह, दने हे मफुम्ह जि थुज्वःम्ह वृद्ध बबुरायात यौन द्वपं बी। स्व थ्व गय् सम्भव जुइ?' थः यौन तरङ्गरहित जूगु खँ वय्कलं धयादी। तर हालय् भारतया च्यय्न्यादँ दुम्ह नांजाःम्ह नेता एन.डी. तिवारीं थःगु शयन कक्षय् न्याम्ह नग्न मिसात लिसे लसपस यानाच्वंगु खँ वइ। हल्ला जुइ। गभर्नर पदं वं राजीनामा बी। थुगु उदाहरणं वृद्धतय् सेक्स लाइफबारे मेगु हे चित्रण याइ। अनुमान याकी। उमेरया खँ मखु खनिं। वृद्धजनतय् सेक्स लाइफ नं जीवन्त जुइफु। एन.डि. तिवारीया यौनकाण्ड उदाहरण जुइ। 'नयाँ पत्रिका'य् हालय् सत्यमोहन जोशीबारे छपु च्वसु ब्वना। वृद्ध ईया सेक्स लाइफबारे वय्कलं अन बिचाः प्वंकूगु दु। 'वृद्धावस्थाय् प्रत्यक्ष सेक्स म्हो सम्भव जुइ। अय्नं सेक्सया कल्पनां वृद्धकाल नं मुक्त जुइ मखु।' शारीरिक क्रिया स्वयाः 'फेन्टासी'या भेषय् सेक्स च्वनी। गुइदँ थ्यनेधुंकूम्ह सत्यमोहन जोशीया धापुतिं वृद्धतय् सेक्स लाइफबारे ज्ञां बी। जिज्ञासाया गथः छुं भचा ब्यं थें जुइ ।

More Stories Like this