मन्त्रीतय्त मनपा प्रवेश निषेध

स्थानीय निकायया कर्मचारीत ज्याय् लिहांवन

प्रधानमन्त्री निकम्मा ठहर

आवंलि पाहां कथं मसःतीगु

येँ (सन्ध्या टाइम्स)/देय्न्यंकंया स्थानीय निकाय ठप्प यानाः आन्दोलन याना वयाच्वंपिं कर्मचारीतय्सं प्रधानमन्त्री माधव कुमार नेपालया नेतृत्वय् दुगु वर्तमान सरकार भ्याः हे जनउत्तरदायी मदुम्ह सरकार धइगु ठहर यासें आवंलि थ्व सरकारयात छुं नं माग मयायेगु व थ्व सरकार विरुद्ध आन्दोलन नं मयायेगु धकाः थनिंनिसें ज्याय् लिहां वंगु दु।
थ्व थेंज्याःगु गैर जिम्मेवारी व अनउत्तरदायी सरकार गबलें नं वःगु मदुनि व भविष्यय् नं वइ मखु धकाः ठहर यासें थःपिंसं ज्या शुरु यानागु खँ आन्दोलन याना वयाच्वंगु समितिया केन्द्रीय दुजः सुजिन्द्र महर्जनं 'सन्ध्या टाइम्स'यात कनादिल। वय्कलं आन्दोलन यानाच्वंपिं स्थानीय निकायया कर्मचारीतय्सं वर्तमान सरकारया फुक्कं मन्त्रीतय्त तकं बहिष्कार यायेगु खँ नं वय्कलं कनादिल।
देय्न्यंकंया स्थानीय निकायय् आवंलि प्रधानमन्त्री माधव नेपाल लगायत थ्व सरकारया सुं हे मन्त्रीतय्त पाहां कथं मसःतेगु व मन्त्रीतय्त स्थानीय निकायय् प्रवेश निषेध यायेगु ज्याझ्वः नं कर्मचारीतय्सं दयेकूगु दु। यदि मन्त्रीत स्थानीय निकायय् वल धाःसा उमित पनेगु व हाकुगु ध्वाँय् क्यनेगु खँ धाःगु दु ।

स्थानीय निकाय संयुक्त आन्दोलन केन्द्रीय समन्वय समितिं थौं छगू पत्रकार सम्मेलन यासें थ्व घोषणा सार्वजनिक यायेगु तयारी याःगु दुसा थःपिनि ज्याय् धाःसा उपिं थौं सुथंनिसें हे लिहां वनेधुंकूगु दु ।

समन्वय समितिया म्हिगः बहनी च्वंगु मुँज्यां देय्न्यंकंया स्थानीय निकायय् कर्मचारी एकता जिन्दावाद-अनउत्तरदायी सरकार मुर्दावाद धकाः नारा च्वयाः हाकुगु ब्यानर तयेगु नं क्वःछिउगु दु। एनेकपा (माओवादी), नेपाली कांग्रेस, नेकपा (एमाल) नापं थीथी राजनीतिक पार्टी नाप लिक्क लाःगु न्यागू कर्मचारी संघं मंकाःगु केन्द्रीय समन्वय समिति नीस्वनाः आन्दोलन यासें वंगु माघ ७ गतेनिसें ज्या ठप्प यानाच्वंगु खः ।

स्थानीय निकायया कर्मचारीतय्सं स्थायी यायेमाःगु, ट्रेड युनियनया अधिकार दयेमाःगु नापं थीथी माग तयाः आन्दोलन याःगु खःसा वंगु पुस १२ गते सरकारं २१ न्हुया दुने माग पूवंकेगु आश्वासन बिउगुलिं ज्या शुरु याःगु खः। तर वकुन्हु नं सरकारं माग पूरा मयायेवं कर्मचारीत हानं आन्दोलनय् कुहां वःगु खः। कर्मचारीत ज्याय् लिहां वनेवं थौं सुथंनिसें येँया थाय्थासय् मुनाच्वंगु फोहोर मुनेगु ज्या नं शुरु जूगु दु ।