नेवाः सभासद्त नं छप्पँ
माघ ३ या र् यालीइ नेतृत्व याः वइगु
नेवाः स्वायत्त राज्य मंकाः संघर्ष समितिपाखें थ्वहे वइगु माघ ३ गते पिकाइगु तःधंगु र्यालीइ संविधानसभाय् दुथ्याःपिं फुक्कं पार्टीया नेवाः सभासद्त दकलय् न्ह्यःने च्वं वइगु जूगु दु । र्यालीया न्हापांगु झ्वलय् थःपिं च्वं वयेगु लागिं वय्कःपिंसं प्रतिवद्धता क्यनादीगु दु ।
संविधानसभाय् दुथ्याःपिं नेवाः सभासद्तय् दथुइ म्हिगः जूगु छगू मुनाय् वय्कःपिंसं थ्व प्रतिवद्धता प्वंकादीगु खः ।
नेवाः देय् दबूया नायः व मंकाः संघर्ष समितिया दुजः मल्ल के. सुन्दरया पहलय् म्हिगः जूगु मुनाय् उपस्थित थीथी पार्टीया नेवाः सभासद्तय्सं नेवाः स्वायत्त राज्य प्राप्त यायेगु मागयात न्ह्यःने यंकेगु लागिं माघ ३ गतेया ज्याझ्वः तःजिक सफल यायेमाःगु बिचाः प्वंकादीगु खः । वकुन्हुया ज्याझ्वलय् थःपिं न्हापांगु झ्वलय् च्वनाः थ्व माग प्रति ऐक्यवद्धता प्वंकेगु खँ नं वय्कःपिंसं कनादिल ।
मुनाय् नेकपा (माओवादी), नेपाली (कांग्रेस), नेकपा (एमाले), नेपाः राष्ट्रिय पार्टी व स्वतन्त्र नेवाः सभासद्तय्सं ब्वति कयादीगु खः ।
मुनाय् थःगु बिचाः प्वंकादिसें नेपाली कांग्रेसया सभासद् ध्यानगोविन्द रञ्जित व कृष्णा अमात्यं नेवाःतय् अस्तित्वया लागिं जुइगु थज्याःगु ज्याझ्वलय् केवल नेवाः जक जुयाः ब्वति कायेमाःगु बिचाः प्वंकादीगु खः । अथे हे नेकपा (माओवादी)या सभासद् राजकाजी महर्जनं स्वायत्त राज्यया लागिं दवाव सिर्जना यायेगु लागिं थज्याःगु ज्याझ्वः यानां तुं च्वनेमाःगु बिचाः प्वंकादीगु खः ।
अथे हे नेकपा (एमाले)या सभासद् डा. मंगलसिद्धि मानन्धरं संसद दुने सः थ्वयेकेगु जक धयां मजिउ, न्हापां पिने सः थ्वयेकेमाल अले थःपिंसं उकियात दुने यंकाः सः थ्वयेके अःपुइ धयादिल ।
नेपाः राष्ट्रिय पार्टीया सभासद् बुद्ध साय्मिं संविधानसभाय् दुथ्याःपिं फुक्कं नेवाः सभासद्तय्त थ्व आन्दोलनय् दुथ्याका हयेमाःगु बिचाः प्वंकादिल ।
संविधानसभाय् ३३ म्ह नेवाः सभासद् दु । तर म्हिगः तिनि छम्ह सुशीलचन्द्र अमात्यं राजीनामा बियादीगुलिं आः ३२ जक दनि ।
मंकाः संघर्ष समितिपाखें थ्वहे वइगु माघ ३ गते सुथय् ११ बजे बसन्तपुलिं उगु र्यालीइ पिकायेत्यंगु खः । र्यालीइ नेवाः स्वायत्त राज्य दये हे माः, नेवाःतय्त अग्राधिकार दयेमाः आदि नारा थ्वयेकीगु खँ धाःगु दु । र्यालीइ नेवाःतय् फुक्क धइथें जातीय व भाषिक खलः पुचःतय्सं ब्वति काइ ।
