भारतया एअर मार्शल तयेगु प्रस्ताव

भारतं नेपाः ब्वया वइगु थःपिनि हरेक विमानय् ल्वाभः सहितया एअर मार्शल तये दयेमाः धकाः नेपाः समक्ष प्रस्ताव तयेवं उकियात कयाः थन थीथी कथंया चर्चा शुरु जूगु दु। भारतं नेपाः प्रति न्ह्याबलें नं दमनया दृष्टिकोणं स्वइगु कारणं आः एअर मार्शल तयेगु धकाः हःगु प्रस्ताव नं अज्याःगु हे ज्याया छगू कडी जक खः धइगु अर्थय् थन थुइकूगु दु। वास्तवय् भारतं नेपाःयात थज्याःगु प्रस्ताव तःगुया लिउने अज्याःगु छुं हे कारण दइ मखु जुइ धकाः तप्यंक धायेफुगु आधार नं मदु। भारतं थःपिनि विमानय् अज्याःगु एअर मार्शलया व्यवस्था यायेमाल धकाः माग याःगु इन्डियन एअरया विमान नेपालं अपहरण याना यंकेधुंकाः खः। उगु इलय् भारतं नेपाःयात थज्याःगु अपमानपूर्ण व्यवहार याःगु खः कि मानौं व अपहरण हे नेपालं याकूगु खः। उकिं भारतीय विमानया सुरक्षा बारे नेपालं छुं हे वास्ता मयायेगु खःसा उमित एअर मार्शल तयेके बिउसा हे झीत याउँसे च्वनी। तर भारतं एअर मार्शल तये धाःगुया लिउने नेपाःया सावैभौमसत्तालिसे सम्बन्धित खँ ला दुगु हे जुल, लिसें कन्हय् वनाः वहे एअर मार्शल मार्फत नेपाःया यात्रुतय्त दुःख बीगु ज्या नं मजुइ धाये मफु। आःयात भारतं तये हइ धाःपिं एअर मार्शल गज्याःपिं खः, उमिगु हैसियत, ज्या व शैली गज्याःगु जुइ धइगु खँ नं आः तक स्पष्ट जूगु मदुनि। यदि भारत वनीगु नेपाःया विमानय् नं अज्याःपिं एअर मार्शल तयेके बी धइगु खँ दुसा उकी नं बिचाः याये मफइगु मखु। थःपिनि सार्वभौमसत्ताय् लिच्वः मलाइ कथं मेमेगु देशय् अज्याःगु अभ्यास जुयाच्वंगु दुसा उकिया नं छक्वः अध्ययन याःसा बांलाइ ला ?

More Stories Like this