लिपाया जुनी नं नेपाःमि जुइमा प्रभु !

नरेन्द्रमान श्रेष्ठ गोंगजु

भारतीय टेलिभिजन च्यानल जी टिभिइ थौंकन्ह्य छगू टेलि सिरियल प्रशारण जुयाच्वंगु दु। थुगु टेलि सिरियलया शुटिङ्ग नेपालय् नं जूगु दु। थुगु सिरियलया नां खः 'अगले जनम में मोहे बिटिया हि किजी'। थ्व टेलि सिरियलया नां न्यनाः जितः नं छता खँ धाये मास्ते वल कि जितः नं मेगु जुनी नेपालय् नेपाःमि हे जुयाः अझ नेवाः हे जुयाः जन्म जुइ दयेमा। थथे धकाः प्रभुयाके वरदान काये मास्ते वल। हाकनं छिकपिंसं थ्व गज्याःम्ह मनू खः धयादी। मेपिं जूसा अमेरिका, बेलायत गन गन जन्मे जुइमा धाइ। तर नेपालय् जन्मे जुइगुया धाःसा मेगु हे छगू मज्जा दु। छगू ला नेपाःमि धाल कि वीरपिं धकाः हलिमय् नां जाः। उकिसनं तसकं सोझा सीधा भलादमि सन्तोषीपिं। देय्या ततःधंपिं चलाखपिं मन्त्री प्रधानमन्त्रीतय्सं न्ह्यागु हे याःसां चुइंक हाली मखु। राज्य चले याइपिं सत्ताधारीतय्सं देय्या धुकू हे स्वये पियाः यंकूसां प्रभुया आशिर्वाद धकाः सहः यानाच्वनीपिं। नेवाःत ला झन् हे सोझा सीधा सहयोगी, दाता, ज्ञानी, गुणी धाःपिं। थःगु आदिभूमिइ पिनेयापिं वयाः थःगु जग्गा, जमिन, सतक, पेटी, ख्यः अतिक्रमण यानाः च्वंसां स्व जक स्वया च्वनीपिं। गुलिखे नेवाःत ला एकदम दाता। थःगु पसः क्वय् थाय् बियाः नाप मेपिंत पसः तयेके बीपिं। थुकिं यानाः लँय् जुइपिं हे वने मछिंक जुयाः थःहे दाजुकिजा तताकेहेँपिंत सास्ती जूसां अले थःगु हे छ्यनय् कःनि मुस्या सिउसां आरामं सह याइपिं खः। थज्याःपिं दानी गुणी नेवाः जुनी अथें काये धयां दइ ला? उकिया लागिं ला द्यःयाके हे फ्वनेमाः। अय् जुयाः फ्वनाच्वनागु, हे प्रभु मेगु जुनी नं नेवाः हे जुयाः जन्म जुइ दयेमा ।

२०४६ साल लिपा देशय् महंगी बढे जू थें बढे जुयाच्वंगु थीथी राजनैतिक पार्टीया नेतातय् व्यक्तिगत स्वार्थ। वहे व्यक्तिगत स्वार्थ पूवंकेगु लागिं उमिसं बन्द, हडताल, जुलुस, चक्काजाम, तोडफोड याइ। अले अज्याःगु न्ह्यागु याःसां मिखा तिसिनाः समर्थन याइपिं खः झी नेपाःमित। न्हियान्हिथं जनता म्वाये मफइ कथं बेसाःभाः थहां वनाः जँ त्वःधूसां म्वायेफुपिं खः नेपाःमि जनता। निगू निगू थासं चुनाव बूसां बूम्ह हे मनूयात प्रधानमन्त्री दयेकेफुपिं मनूत खः नेपाःमि जनता। नेपाली जनता व देय्यात झ्वाकलय् थुनाः थः कलाः मचाखाचा अले आसेपासेत ज्वनाः जनताया ध्यबां बाछिया छकः प्रधानमन्त्री व मन्त्रीत विदेश वंसां लापा थानाः लय्ताये सःपिं खः नेपाःमि जनता। हलिमय् निगूगु जलस्रोतया तःमि देय् धकाः नांजाःगु झीगु देशय् आः न्हिं ११ घौ तक लोडसेडिङ याःसां क्यान्डल लाइटय् जा नयाः मज्जा कायेसःपिं खः झी नेपाःमि जनता। थज्याःगु गुण ज्वनाः हानं जन्म कायेत द्यःया वरदान मदयेकं सम्भव हे मदु। उकिं मेगु जुनी नं थन हे जन्म काये दयेमा धयागु खः ।

हलिमय् दकलय् अप्वः बन्द, हडताल, जुलुस, चक्काजाम, भ्रष्टाचार, अपहरण व लोडसेडिङ नेपालय् जुइ। नेपालय् ति बन्द व हडताल विश्वया मेगु गुगुं हे देशय् जूगु खइ मखु। नेपाल बन्द जुल कि फुक्कं ज्या बन्द। अले फुकस्यां फुर्सद। खास ज्या धइगु हे याये माःगु मदु। ज्या धइगु हे बन्द यायेगु का। कि सतक जाम यायेगु। चिकुलाबलय् बन्दय् निभाः पानाः बरां नयेगु अले बरां जक नयागुया नं लय् छक्वः तलब नयेगु गुलि जक न्ह्यइपु। नेपालय् जन्म जुल कि चुनावय् पराजित जूसां उपप्रधानमन्त्री, प्रधानमन्त्री जुइ खनी। स्वला मन्त्री जुल कि स्वंगू करोड कमे याये खनी। छगू करोड वंगु ला गाडी हे गये खनी। न्ह्याक्व हे भ्रष्टाचार या पिने क्यनेत केश ला चले जुइ तर अदालतं सफाई बिया हे हइ। भ्रष्टाचार यात धकाः कारवाही जुइ मखु, तलब रोक्का जुइ मखु गुलि आनन्द। अय् जुयाः नं थज्याःगु हे देशया नागरिक जुयाः हानं हानं जन्म काये दयेमा धकाः द्यःयाके फ्वनागु खः।
देय्या शहर बजारय् न्ह्याबलें दंगुर का दंगुर फोहोर मुनाच्वनी, अज्याःगु नवःगुया बास कयाः नं महानरकपालिकाय् च्वंच्वनेगु बानी जुइधुकूपि नेपाःमितय्त अमेरिका समेरिकाय् जन्म जुयां छु याये? अन थज्याःगु फोहोरसोहोर नं दइ मखु। अले म्वायेगु गय् यानाः? म्वाये हे फइ मखु। अमेरिका व बेलायत थेंज्याःगु देशय् नेपालय् थें फोहोरया दंगुर दइ मखु, झी नेपाःमित धाःसा फोहोरया द्वँ स्वयाः उकिया बास छक्वः मकायेकं ला नयागु हे पचे मजुइपिं। अले झी थेंज्याःपिंत नेपालय् जन्मे मजुसें गात ला? नेपालय् नेपाली जुयाः जन्म कायेबलय् न्ह्यागु एंगलं स्वःसां जिउ। अय् जुयाः नेपालय् नेपाली जुयाः जन्मे जुइमा धकाः प्रभुयाके फ्वनेमाःगु खः। बरु हानं मेगु जुनीइ नेपाःमि जुयाः जन्म जुइबलय् सर्वसाधारण नेपाःमि मजुसे फयांफत्तले नेतासेता, घुस्याहा, भ्रष्टाचारी, पार्टीया सभापति, सभापति मखुसा सभापतिया म्ह्याय् जक जुयाः जन्म काये दःसां जिउ। अय् यानाः जन्म काये दःसा झीगु जीवन नं सफल व सार्थक जुइगु खः ला ?

More Stories Like this