मांभासं नं सपथ काये दइगु व्यवस्था

आः नेपाःया संविधान कथं मन्त्रीं निसें कयाः राष्ट्रपति तकं जुइपिं सुं नं मनुखं थःगु पद व गोपनीयताया सपथ थःगु हे मांभासं याये दइगु जूगु दु। अन्तरिम संविधानय् जूगु न्हय्क्वःगु संशोधनपाखें थ्व व्यवस्थाया प्रत्याभूति जूगु खः। उपराष्ट्रपति परमानन्द झां हिन्दी भासं सपथ ग्रहण याःगु कारणं वय्कःया पद हे निष्क्रिय जुइ धकाः सर्वोच्च अदालतं याःगु फैसलायात उल्टे यायेगु हिसाबं संसदपाखें संविधान हे संशोधन यानाः थ्व व्यवस्था हःगु खः। राज्य पुनर्संरचना जुयाः संघीय व्यवस्थाय् प्रवेश जुइत्यंगु वर्तमान नेपाःया सन्दर्भय् थ्व अतिकं महत्वपूर्ण व सामयिक पलाः खः। संसदं याःगु थ्व ज्याया कारणं सदियौंनिसें भाषिक अधिकारया लागिं जुयाच्वंगु आन्दोलनं छगू हद तकया सफलता चूलाकूगु दु ।

देशय् थ्व अवस्था वःगुया लिउने उपराष्ट्रपति परमानन्द झां हिन्दी भासं काःगु सपथं मू भूमिका म्हितूगु दु। वय्कःयात खस भासं हानं सपथ काल धाःसा पद बहाली याना बी धकाः सर्वोच्च अदालत व सरकारं इनाप याःगु खःसां नं वय्कलं उकियात अस्वीकार यासें बरु पद हे त्याग यायेत तकं तयार धकाः गुगु अडान क्यनादीगु खः, व निसन्देह स्तुत्य जू। वय्कःया वहे अडानं यानाः थौं संविधान हे संशोधन जुयाः देय्या सकलें मांभाय्ह्यमितय् छ्यों गर्वं धस्वायेफुगु स्थिति तक थ्यंगु दु ।

अन्तरिम संविधानय् जूगु थ्व संशोधन लिपा आः भाजु परमानन्द झां हानं छु भासं सपथ काइ धइगु न्ह्यसः वःगु दु। यद्यपि आः न्ह्यागु हे भासं सपथ कायेत नं वय्कः स्वतन्त्र दु। अथे खःसां थःगु धाथेंया मांभासं हे सपथ कयादीसा मांभाय्या नं इज्जत च्वनीगु खइ ।

More Stories Like this