पाइलटत एअर मार्शलया पक्षय्
'एअर मार्शलं यात्रुत नं सुरक्षित जुइ'
येँ (सन्ध्या टाइम्स)/भारतं नेपाः वइगु विमानय् एअर मार्शल तयेमाल धकाः भारतं यानाच्वंगु इनापयात थन देय्या सार्वभौमसत्ताय् यायेत्यंगु हस्तक्षेप धकाः व्याख्या यानाच्वंसां विमान चले यायेगु ज्या याइपिं नेपाःया पाइलटतय्सं धाःसा यात्रुतय् सुरक्षाया लागिं नं एअर मार्शल तयेगु प्रस्तावयात नेपालं स्वीकार यायेमाः धयाहःगु दु ।
नेपाल पाइलट संघया नायः क्याप्टेन वाईके भट्टराई नं विमानय् ल्वाभः सहित वइपिं अज्याःपिं एअर मार्शल तल धकाः नेपालं आपत्ति क्यनेम्वाःगु बिचाः प्वंकादीगु खः। अज्याःपिं एअर मार्शल धइपिं अप्वः यानाः खुम्ह ति दइगु व उपिं यात्रुतय् दुने हे घुलमिल जुयाः वइगु जूगुलिं उमित तये हल धकाः विरोध यायेम्वाःगु खँ कनादीगु दु। छक्वः थः हे नं राष्ट्र बैंकया ध्यबा ज्वनाः भारत वनाच्वनागु इलय् नेपाःया एअर मार्शल तया वनागु घटना नं वय्कलं कनादिल। ध्यबा ज्वनाः दिल्ली वनाच्वनागु इलय् मौसम स्यनाः विमान पटनाय् हे क्वकायेमाःगु व अन एअर मार्शलया जवानत थःपिनि ल्वाभः सम्बन्धित विभागय् तयाः थःपिनिगु हे होटलय् च्वं वःगु खँ नं वय्कलं कनादिल। एअर मार्शल दत धाःसा विमान सुरक्षित जुइ धासें आः नकतिनि भारत व अमेरिकाया दथुइ नं थःथःपिनि विमानय् एअर मार्शल तयेगु सम्झौता जूगु खँ कनादिल ।
एअर मार्शल तया हे हयेधुंकल ?
नेपाः वइगु थःपिनि विमानय् एअर मार्शल तयेके माल धकाः भारतं नेपाःयात इनाप याःसां थौंकन्हय् नेपाः वइगु भारतीय विमानय् एअर मार्शल धाःसा तया हयेगु शुरु हे जुइधुंकूगु खँ विशिष्ट सूत्रं धाःगु दु। भारतं गोप्य रुपं एअर मार्शल तया हे हयेधुंकूगु दावी सूत्रं याःगु दु ।
विमान अपहरण मजुइमा धकाः सुरक्षाया लागिं ल्वाभः सहित च्वना वइपिं थज्याःपिं एअर मार्शलत खास यानाः यात्रुतय् दुने हे घुलमिल जुयाः गोप्य रुपं वइगु खः। तर गोप्य रुपं जक वःसां गाःपिं एअर मार्शल तये माल धकाः भारतं खुल्ला रुपं इनाप यानाच्वंगुया अर्थ छु खः धकाः नं थन न्ह्यसः तया हःगु दु। भारतं नेपाः वनीगु थःपिनि विमानय् सेना नं च्वना वनी धइगु खँ सार्वजनिक यानाः नेपाःयात थःगु सुरक्षा संयन्त्र दुने लाके धुन धइगु सन्देश बीत स्वयाच्वंगु दावी सूत्रं याःगु दु ।
एअर मार्शल तयेगु भारतीय इनापयात नेपालं राष्ट्रियताया न्ह्यसःलिसे स्वानाः आः तक स्वीकार याःगु मदुनि ।
