'भिंतुना' स्वयेधुंकाः मनय् लूगु खँ

देवदास मानन्धर

ल्यासे मय्जु बांलाः...
राष्ट्रिय नाचघरया दबुली न्ह्यब्वःगु 'भिन्तुना' प्याखं स्वयेधुंकाः तःन्हु लिपा तकं 'ल्यासे मय्जु बांलाः बेइमान याये मते न्हां' धाःगु म्येँ जिके ल्यनाच्वन। प्याखंया छता छता खँ लित्तु लिनाच्वंगु जिगु स्थितियात प्वंकेमाः थें जुल। नुगःखँ प्वंकेधुंकाः जक मन क्वलाइगु तायेकाः च्वसा ल्ह्वना।
नुगःखँ छसीकथं तये ।

न्हापां लिपि। रञ्जना लिपि छ्यलाः स्वकुमिपिंत आखःया दुने वाला स्वयेत लसकुस याःगु खने दु। मेगु प्याखनय् नेपाल लिपि नं स्वये दइगु आशा याना।
भाय् - नेवाः गैर नेवाःतसें थुइके फइगु भाय् छ्यलातःगु दु।
संगीत - स्वनिगलय् ल्वकंह्वाःगु म्येँ 'ल्यासे मय्जु बांलाः...' बसन्त नसंचा म्येँ (खँग्वः मदुगु, मनू सः मदुगु) थुकिया मू इल्वहं खः।

जातया खँ - टिकटय् च्वयातः कथं थ्व प्याखं जनजातिया संकिपाया झ्वलय् क्रिटिक्स एवार्ड काःगु प्याखं खः। जातीय संस्कार दुने बुसांनिसें सीधुंकाः तक याइगु संस्कारया दुने नेवाःतय् गुकथं मिसा व मिजं छक्वलं मंत धाःसा गुम्ह न्हापां सिथं यंकेगु धयागु खँयात क्यनातःगु दु। थुगु विषययात न्ह्यब्वयेत प्याखं च्वमि व निर्देशक निम्हं सफल तायेका ।

नेवाः पुचःया दुने ल्यं दनिगु हिंसाया प्रत्यक्ष दुश्य म्ह हे कुच्चुसे च्वंक क्यनेत किपाः काःम्ह सफल जू। हिंसाया थुगु दृश्ययात निर्देशकं स्वाभाविक पहलं न्ह्यःने तल ।

दबू प्याखंया नेवाः समाजलिसे स्वापू क्यनेगु कुतः यइपुस्से च्वं। नेवाःतय्गु नखःचखःयात बाखंलिसे न्ह्यइपुक हनातःगु दुसा अय्लाखं नेवाः समाजयात गुलित क्वत्यला तःगु दु, खँ क्यं ।

प्याखंया बाखं - 'ग्वंगःछ्यों' बाखंया लिधंसाय् च्वयातःगु खःसां बाखंया अति क्यातुगु पक्षयात साप हे न्ह्यइपुक प्याखनय् हिलेफुगु प्याखं च्वमिया विशेषतायात जिगु यक्व यक्व भिंतुना ।

भाय् प्रस्तुती - तःगू अर्थ क्यंकाः छ्यलातःगु खँल्हाबल्हाया भाषाय् अश्लीलता मदु गुकिं यानाः 'राजमति थँहिति, क्वहिति व मरुहिति' साहित्यया छगू विधा जू थें वयस्कताया अर्थं भुनाः न्ववाका तःगु भासं प्याखं स्वतले हल जायेक न्हिलासः थ्वः, प्याखं सिमधःतले थुकथं हे न्हिलासः थ्वः। प्याखं स्वयाच्वंम्ह छम्ह मचां थँजिम्हेसिके न्यन, '....के देखाउ भनेको ?'
'न्हाय्कं क्यँ धाःगु का।'
'देखायो त?'
'व मखं ला?'
'कहाँ छ?'
थुकथं स्वकुमिपिंत वयस्कताया इलं मकाःनिम्ह मचां तःगु न्ह्यसलं अझ वातावरण न्हिला सलं थ्वल।
ख्यालिया ख्यलय् बहु अर्थया खँग्वः छ्यलेगु स्वभावया लिधंसाय् प्याखं दयेकातःगु खनेदु। थुगु पहलय् प्याखं च्वमि व प्याखं म्वाः व निर्देशक सफल धयागु खँ क्यं।
सस्पेन्स - प्याखं स्वस्वं विविध इलय् 'थथे जुइन, आः थथे जुइ का' धइगु छगू बिचाः स्वकुमिपिनिगु नुगलय् ब्वलंकेत प्याखं सफल जू। स्वकुमिपिनि थुगु बिचाःयात गुकथं ज्याय् छ्यलेगु धयागु खँय् नं प्याखं सफल जू।
मिसा जागरणया खँ - नेवाः समाजय् मिसातय्गु भूमिका छेँज्यांनिसें बुँज्या तक बांलाक छ्यलेगु कुतः जूगु दु।
प्याखंम्वःत - प्याखं न्ह्याये न्ह्यः स्वांमाः क्वचाये खंम्ह झी कवि दुर्गालालजुं मजिमगाःगु दिपाः कयाः लिहां झाःबलय् थुकथं खँ ल्हाल्हां झाल, '...मू पात्र जक मखु, छम्ह थे छम्ह पात्र उलि हे बांलाः...।' जिं नं थथे हे धाये। प्याखंम्वःतय् दुनेया नेवाः पहः ब्वयेत प्याखंम्वः व निर्देशक सफल।
मगाःगु पक्ष - सः इलय् ब्यलय् त्वाः दः। गबलें गबलें न्हाय्पं न्वः। निथाय् प्यथाय् वहे वाक्य लिसा कया तल। संगीतया ख्यः साप हे कय्कुं। किपातय् रंग मगाः ।

'भिंन्तुना' प्याखं छेँजःपिं सकलें छथाय् च्वनाः स्वये जिउगु प्याखं खः। स्वतले साला तये फुगु विशेषता थुकी दु। 'भिन्तुना' प्याखं सकल नेपाःमिं स्वयेमा जिगु भिंतुना ।

More Stories Like this