सिक्किमय् नेवाः बाजं व प्याखंया प्रशिक्षणय् उत्साहजनक सहभागीता

भारतीय राज्य सिक्किमया पश्चिमी उपत्यका देन्तामय् अनया नेवाःतय्गु संगठन न्हूजः गुथिपाखें न्ह्याकूगु नेवाः बाजं व प्याखंया प्रशिक्षणय् अनया नेवाःतय्गु सहभागीता तसकं उत्साहजनक जूगु धाःगु दु । थुगु कक्षाय् सिक्किमया थीथी थासं न्यय्म्ह मनूत सहभागी जुयाच्वंगु खँ ग्वसाः खलकं नेपालमण्डलयात जानकारी ब्यूगु दु ।

नेपाःया मध्यपुर कला परिषदपाखें अन झाःम्ह मय्जु शर्मिला महर्जनपाखें अन लच्छितक चचा व मेमेगु प्याखं स्यनेज्या क्वचाःगु दुसा नेपाःपाखें हे झाःम्ह भाजु कुलरत्न मानन्धरं आ अन नेवाःतय्गू थीथी बाजं थायेगु प्रशिक्षण बिया च्वनादीगु दु ।

प्राप्त जानकारी कथं थ्व हे वइगु फेब्रअरी ११ व १२ तारिखय् सिक्किमया देन्ताम छगू भव्य नेवाः मुना ज्याझ्वः याइगु व प्रशिक्षणया समापन याइगु जूगु दु । थुकिया लागि मूपाहां कथं नेपाःपाखें भाजु गणेशराम लाछि अन झायादीत्यंगु दु ।

More Stories Like this