हानं अशान्ति जुइन

सम्पादकजु,

नेपाःया थाय्थासय् अझ नं वाईसीएल व युथ फोस्र धाःपिनि ल्वापु जुयाः तसकं अशान्ति जुयाच्वंगु दु । उकुन्हु तिनि येँया हे जितपुरफेदीइ युथ फोस्रया छम्ह स्थानीय नेतायात दायाः तुति तकं पाला बिउगु समाचार न्यनाः झी सकलें स्तब्ध जुइमाल । छगू पत्रिकाय् वयागु तुति हे चानातःगु फोटा नं प्रकाशित जूगु दु । थ्व ला तसकं हे विभत्स धाःसां जिउ । अय् यानाः ला मनूतय्त सास्ती यानाः आक्रमण याये मजिउगु खः । थुकिं यानाः कन्हय् युथ फोस्रं नं कन्हय् वनाः वाईसीएलया कार्यकर्तायात अथे हे यानाः ल्हाः तुति पालाः सास्ती याना बिल धाःसा वयात ठीक यात धायेगु लाकि बेठीक यात धायेगु ठीक धाये धाःसा अथे तुति हे पालेगु ज्यायात गय् यानाः ठीक धायेगु । आः बेठिक धाये धाःसा उमिसं याये जिउ जिमिसं जक याये मजिउ ला धकाः धाः वइगु सम्भावना दु । सर्वसाधारण मनूतय्सं छु धायेगु युथ फोस्र व वाईसीएल धाःपिं गुण्डा मवाली थेंज्याःपिं ला मखु । उपिं राजनीतिक पार्टीया बिचार ज्वनाः सनीपिं खः । तर उमिसं गुण्डातय्सं थें हे मनूतय्त दायाः पालाः स्यानाः घटनात याना जूगुलिं देशय् अशान्ति वइगु खने दत । उमित नियन्त्रण याइगु पार्टीत छु यानाच्वंगु खः आः तक ?

- विष्णु ताम्राकार, यल ।

More Stories Like this