इलय् संविधान मवल धाःसा वयेफुगु खतरा

२०६७ सालया जेठ १४ गते तकया दुने नं यदि संविधान दयेके मफुत धाःसा वयां लिपा देशय् गज्याःगु स्थिति सिर्जना जुइ? थुकियात अनेक कथंया विश्लेषणत जुयाच्वंगु दु। थौंकन्हय् आन्दोलन यानाच्वंगु माओवादीं यदि इलय् संविधान दयेके मफुत धाःसा जनविद्रोह यानाः सत्ता कब्जा याइ धकाः व्यापक अनुमान जुयाच्वंगु हे इलय् यदि बियातःगु तिथि कुन्हु संविधान जारी याये मफुत धाःसा वनेधुंकूगु राजसंस्था हे हानं पुनर्स्थापित जुइ धइगु मेगु तर्क नं न्ह्यःने हयाच्वंगु दु। संविधान इलय् मवयेसातकि वनेधुंकूम्ह जुजुयात हानं गद्दीइ तयेमाः धइगु माग यायेत पुलांपिं जुजुवादी शक्तित संगठित जुइगु तयारी जुयाच्वंगु समाचारत पिहां वयाच्वंगु दु ।

गुलिस्यां हानं थथे नं धयाच्वंगु दु कि अज्याःगु अवस्थाय् वर्तमान संविधानसभा भंग जुयाः देशय् राष्ट्रपति शासन लागू जुइ। नेपालय् राष्ट्रपति शासन चले यायेगु लागिं नं थीथी कथंया अन्तर्राष्ट्रिय कोणं कुतः जुयाच्वंगु बुखँत नं वयाच्वंगु दु। यदि अन्तर्राष्ट्रिय समर्थन दत धाःसा अज्याःगु पलाः ल्ह्वनेगु ज्या नं मजुइ धाये मफु ।

उकिं बियातःगु इलय् यदि संविधान मवल धाःसा देशय् छु गज्याःगु स्थिति वइ धकाः देशय् अनेक अनुमान जुयाच्वंगु खँ थुकिं सीदु। थ्व अनुमानतय्सं धाइ, यदि संविधान इलय् मवल धाःसा देशय् बांलाःगु घटना चाहिं जुइ मखु। न्ह्यागु कथंया नं घटना जुइगु खतरा दु। भारत, चीन व अमेरिकाया अप्वयाच्वंगु नेपाल-रुचीया दुने नं थज्याःगु हे अनुमानं थाय् कयाच्वंगु मदु धकाः धाये फइ मखु। थुकी सकल जनता सचेत जुइमाःगु दु ।

More Stories Like this