पुलिस पाः तया फोहर मुन

येँ (सन्ध्या टाइम्स)/ स्थानीय निकायया कर्मचारीतय्सं निर्णायक आन्दोलन धकाः देय्न्यंकंया स्थानीय निकाय बन्द यानाः फोहर तकं ममुंसे तयातःगु खःसा थौं सरकारं प्रहरी हे पाः तयाः राजधानीया थीथी दुवातय् मुनाच्वंगु फोहोर मुनेगु शुरु याःगु दु ।

स्थानीय विकास मन्त्रालय नापं सुरक्षा निकायया प्रतिनिधित च्वनाः म्हिगः याःगु सहलह लिपा थौं सुथंनिसें फोहोर मुनेगु ज्या न्ह्याकूगु खः। थौं सुथय् १० बजेनिसें येँया जमलंनिसें हे गाडी हयाः फोहोर मुना यंकेगु ज्या न्ह्याकूगु खः। यदि सरकार थःपिंसं हे फोहोर मुनेगु ज्या न्ह्याकल धाःसा स्थानीय निकायया कर्मचारीतय्सं पंगः थं वयेफु धइगु खँयात ध्यानय् तयाः फोहोर मुनेथाय् सशस्त्र प्रहरी हयाः घेरे याकूगु खः। अन यक्व द्वँचिंक मुनाच्वंगु फोहोर ल्ह्वनेगु लागिं चिग्वःगु डोजर छ्यःगु खः ।

स्थानीय विकास मन्त्रालय अन्तर्गत फोहरमैला स्रोत परिचालन तथा व्यवस्थापन केन्द्रया महाप्रबन्धक सुमित्रा अमात्यं 'सन्ध्या टाइम्स'लिसे खँ ल्हासें थौं सरकारं निजी क्षेत्रयात परिचालन यानाः फोहोर मुनेगु ज्या न्ह्याकूगु जानकारी बियादिल। वय्कलं थौं हे येँया बागबजाः, न्यूरोड, वालुवाटार, कोटेश्वर नापं थीथी थासय् द्वँचिनाच्वंगु फोहोर मुनाः ओखरपौवाय् यंकीगु खँ नं कनादिल। वय्कलं थौं फाहोर मुनेत निजी क्षेत्रयात छ्यःगु खःसां फोहोर व्यवस्थाया जिम्मा निजी क्षेत्रयात बी हे धुंकूगु धाःसा मखु धयादिल। कामपाया कर्मचारीतय् रोजगारीयात लिच्वः मलाक फोहोर व्यवस्थाया जिम्मा निजी क्षेत्रयात बीगु तयारी जुयाच्वंगु जानकारी नं वय्कलं बियादिल ।

उखे आन्दोलनरत कर्मचारीतय्सं धाःसा निजी क्षेत्रयात नं फोहोर व्यवस्थापनया ज्या मयाकेगु निंतिं थौं सुथंनिसें वार्ता यानाच्वंगु दु। आन्दोलन परिचालन समितिया छम्ह दुजलं पुलिस पाः तयाः फोहोर मुंकेमाःगु धइगु हे कर्मचारीया नैतिक विजय खः धासें फोहोर मुना यंकूसां आखरपौवाय् वाये फइगु अवस्था धाःसा मदु धाःगु दु ।