हानं लडाकुया लँय् वनाच्वंपिं 'अयोग्य'त

देय्या थीथी शिविरय् च्वनाच्वंपिं अयोग्य लडाकुतय्त शिविरं चीकाः छेँय् छ्वयेगु ज्या धमाधम न्ह्यानाच्वंगु दु। कुल २१ गू शिविरपाखें प्यद्वः स्वयां अप्वः अयोग्य लडाकु चीकेगु ग्वसाः कथं थ्व ज्या न्ह्याकूगु खः। तर अनं त्वःता वनीपिं लडाकुत वन वनी, उमिसं भविष्यय् वनाः छु ज्या याइ धइगु विषयय् धाःसा सरकार व सरकारय् दुथ्याःगु राजनीतिक पार्टीतय्सं चिउताः तयाच्वंगु खने मदु। नकतिनि समाचारय् वःकथं शिविर त्वःताः पिहां वंपिं लडाकुतय्त माओवादी त्वःताः हानं माओवादीया हे नामय् युद्ध यानाच्वंम्ह मातृका यादवया पार्टीं ल्हातय् कायेगु ज्या यानाच्वंगु दु। मातृकाया पार्टी आः ला छुं हैसियत दुगु संगठन मखु। तर थ्व 'अयोग्य लडाकु' फुक्क अन वनाः च्वना बिल धाःसा वयागु हैसियत अथें बने जुइ। थःपिंत सेनाय् समायोजन मयाःगु, जीवन अस्तव्यस्त याना बिउगु, शिविरं पितिनाः अपमानित याःगु व पिहां वयाः नं समाजय् बांलाक च्वने मफुत धाःसा उकिया ब्वलासायेगु समेत ताः तयाः थ्व अयोग्य लडाकुत मातृकाया संगठनय् सहभागी जुइगु सम्भावना दु। उमित मातृकां उपयोग यायेगु सिबें उमिसं मातृकाया पार्टीयात उपयोग यानाः थःपिनि आक्रोस प्वंकीगु खतरा दु। अयोग्य लडाकुयात शिविरं चीकेमाः जक धकाः कचकच यानाच्वंपिं राजनीतिक पार्टीतय्सं थुखेपाखे बिचाः याःगु हे खने मदुनि। यदि थ्व लडाकुत थुकथं प्रस्तुत जुल धाःसा उकिं क्षति याइगु माओवादीया संगठनयात जक मखु मुक्कं देय्यात खः। अज्याःगु इलय् माओवादीयात जक द्वपं बियाः पार जुइ मखु ।

More Stories Like this