तर वं दोष फये माली

नर्मदेश्वर प्रधान

पुष्पजुं दः अनुरोध याइ। 'थ्व सामान अन थ्यंका बियादिसँ। लँ कथं लाः।' अनुरोध न्यने। जिउ धया। छेँय् वनेबलय् लँय्सं हे लाः। म्हां धाये माःगु खँ मदु। मनू नापलानाः सामान लःल्हाना बीगु जक खः। अय्नं जिं छता निता खँ न्यने। छेँ म्हसीके फइ ला थें? मोटर दुहां वनी ला? 'मखु, जिं फोन नम्बर बी। फोनं सःतादिसँ। प्यकालँय् वइ। सामान काइ। छेँय् थ्यंक वनेम्वाः' पुष्पं थुइकी। फोन नम्बर कया। छेँपाखे वना। प्यकालँय् थ्यनीन। जिं मोबाइल याये, ".... ! छितः छुं सामान बीमाःगु दु। प्यकालँय् झासँ। जिगु मोटर नम्बर ....। तुयुगु रङ्गया।" जिं धयाछ्वये। "भचा जक दुहां झाःसा गाः" छेँय् हे छकः झाये फइ ला..." खँ न्यने। झरङ्ग तं वइ। छु धाःगु थ्व। गन दुहां वनाच्वनेगु। मोटर बाय्क गय् यायेगु? धाइपिनि गुलि अःपु। झं जिउ धया। सामान ज्वनाः वया। काः वा धयां छेँय् थ्यंका बियादीसां जिउ हं धया हइ। गुलि अःपुगु खँ। मनूत थौंकन्हय् मछाः हे मजुइ धुंकल। थःत माःगु सामान काः वयेगु ला गन गन ! अःखः छेँय् थ्यंका बियादिसँ। इनाप याना हइ। गुज्वःगु इनाप थ्व ! थ्वइत इनाप धाइ ला? अहे ! थ्व इनाप मखु। थ्व ला हुकुम जुल का। गय् जक धाये छाःगु। अले जिं लिसः बियाछ्वये "महाशय ! छेँय् वये फइ मखु। छि हे प्यकालँय् झासँ। जि पलख अन पी। मखुसा वने। छिगु सामान पुष्पजीयाथाय् लित बी। छिं पुष्पजीलिसे हे स्वापू तयादिसँ।" स्पष्ट नक्सां धयाछ्वया। जमाना गुज्वःगु वल। ग्व? धाये नं गय् छाःगु ! प्यपलाः वयाः थःगु सामान काये थाकु हं। मोटर ज्वनाः गल्लिइ वा हं। गल्लिइ वने अःपु ला? मिखां छुं मखन। व महाशययात फोनं हे तं क्यनाः धयाछ्वया। महाशयं लिपा जिद्दी याये मछाल। "म्वाःल, जि हे काः वये। मछिंसा तकलिफ यानादी मते। बरु जि हे बुलुहुँ वये। छिं जितः म्हमसियाच्वनी। जिगु पाइन्टया रङ्ग हाकु। कमिज चेक। चस्मा दु। जि वये। छिं याद यानादिसँ ।"

महाशयं बिउगु बयान न्यना। लुमंके। एकचित्त याये। पियाच्वने। मतिइ खँ ल्हाके। थ्व मनू पक्कां हिरो जुइमाः। वसःया बयानं हे सीदु, 'हाकुगु पाइन्ट, चेक चेक कमिज, चस्मा। सः नं तिख्खर हे। ल्याय्म्ह हे जुइ। फूर्तिबाज थें च्वं। उकिं हे मखा जुइ वं दः छेँय् वयाः सामान बिउ वा धाःगु। जि नं छु कम। वयागु फूर्ति झारे याना बिया। 'छेँय् वयाः बिउ वये फइ मखु। माःसा प्यकालँय् झासँ। पलख जक पी। मखुसा गनं बियाहल अन हे थ्यंका बी धयाछ्वया। अले तिनि व क्वमिलु जुइ। धाइ, 'मखु छिं। जिं हे काः वये। पलख...।' कायल जुयाः धाइ। थौंकन्हय् म्हुतु नं कडा जुइमाः। सोझा जुयां गन जी। म्हुतु नाइकां मजिउ। कतिलाःसिंतय् जमाना। सोझापिंत प्याखं ल्हुइका तइ का। जिं नं छुया कम जुइ। मछालां जी ला। मछाःलिसे मनूतसें पेले याइ का। कि पेले याकाः च्वने माल। कमजोर जुयाः। कि माःगु खँ तछ्यानाः धयाबी माल। मग्यासे। प्यकालँय्। मतिइ अनेतने खँ लुइके। पी। मतिइ ठेगाना याये। पलख पी। ताउतक गन च्वनेगु? छेँय् वना छ्वये। लिबाइ। लँ लाःगुलिं जक 'जिउ' धया। थथें वःसां बी। मखुसा वना छ्वये। ताउतक मपीगु क्वःछिना।
पीगु ज्या अःपु मजू। ई ला ५ मिनेट जक जुइ। अय्नं बाघौ थें जुइ। ग्व, वइगु खः ला मखुला? धैर्य तनी। खँ दासि वइ, 'आः दुई मिनेट पी। वयां अप्वः पी फइ मखु। जि वना छ्वये। वःसा वइ। लिहां वनी का। जिं छु याये। प्यकालँय् च्वने। घण्टौं पी। थ्व जुइ फइ मखु। धैर्य टुटे जुइ थें जुइ थें जुइ। मनू खनी। हाकुगु पाइन्ट। चेक चेक कमिज। जितः पक्का जुइ। सामान काःवःम्ह मनू व हे जुइमाः। जिं स्वयाच्वने। वसःया बयान कथं थ्व हे मनू खः। पक्का जुइ। तर जि द्विविधाय् लाइ। जिं अनुमान याना थें हिरो ला मखु खनी। तुतां ज्वना वयाच्वन। तुतांया त्याकत्याक सः बुलुहुँ वइ। दी। हाकुगु चस्मा। वया मिखां गुखे स्वयाच्वन। जिं धाये फइ मखु। जि छत्थुं गम्भीर जुइ। 'छि झासँ ..." उजं बिउम्ह मनू व। खनी। तं क्यनेत जि तयार जुयागु खः। तर नुगः हिली। छत्थुं। जिगु सोच फुक्क गलत। यकिन जुइ। जि मोटरं कुहां वये। दनाच्वंम्हपाखेर वने। लँय् कथिं चुयाः सालिक थें दनाच्वंम्ह व। वयागु न्ह्यःने वने। न्यने, "छि फल्ना खः ला? सामान काः झाइगु खः ला?" "खः'' वं कथिं चुयाः लिसः बी। जिं वइगु ल्हाः ज्वने। सामान ल्हातय् तया बी। का बांलाक ज्वनादिसँ। ल्हाः ज्वने। पलख क्वातुक ज्वने। त्वःते मास्ते वइ मखु। जिं धाये, "छिं अथे धकाः धयादी म्वाःला? जि हे वये नि छिगु छेँय्। सामान बीत..।" जि नतमस्तक जुइ। "छिं न्हापा हे धयादी म्वाःला अथे धकाः... जि हे वयेगु नि छिगु छेँय्। लिसा लिसा काये। जितः अपराधबोध जुइ। छाय् मधाःगु वं दः। अथे धकाः। मतिइ मतिं हीमीचाये मास्ते वइ। जिं बिउ वनेमाःगु वयागु छेँय्। पश्चाताप जुइ। अथे धकाः जिं छुं मसिउ। नुगलय् न्ह्यसः थ्वयाच्वनी। जिं वयागु ल्हाः ज्वने। "का झासँ, छितः छेँय् तक त्वःता बी..." जिं धया। ल्हाः ज्वने। छेँय् तक त्वःताः अनं छेँय् लिहां वया। छु बिचाः यानागु। छु जूगु। पुष्पं नं मधाः। वं नं दः संकेत मयाः। जिं मोटरया नम्बर कना छ्वया। रङ्ग कना छ्वया। वं न्यनी। छुं धाइ मखु। जिं छु सिउ अथे धकाः? जिगु जीवनया ल्वःमंके मफइगु घटना जुया बी थ्व...।

मदनजीलिसे उकुन्हु अपाङ्ग साहित्य विषयय् छलफल जुइ। अपाङ्गतसें थौं हीनताबोध यायेम्वाः। अपाङ्ग सपाङ्गया भेद थौं अन्त जुइ। अपाङ्गतसें नं थःगु संकोचयात त्वःतेमाः। सृजनात्मक अभिव्यक्ति न्ह्याकेमाः। अपाङ्ग साहित्यया नं थौं सौन्दर्यशास्त्र दइ। अस्मिता दइ।
मदनजीया मार्मिक खँ न्यने। मेगु घटना लुमना वइ। पद्मजीं कंगु। जनसेवाय् छम्ह मिसायात धक्का लाइ। मिसा तं चाइ। म्हुतु वाइ, "गुज्वःम्ह कां थेंज्याःम्ह मनू। मिखां नं मखं ला?" सपाङ्गयात व्यङ्ग्य नकाः न्ववाःगु मिसाया भाय् मखुथाय् लानाबी। धक्का बिउम्ह दृष्टिविहीनम्ह मनू लाइ। अनजानय् वं धक्का बी लाइ। उकी वया छुं दोष दइ मखु। तर वं दोष फयेमाली ।

More Stories Like this