संविधान दयेकेगु ज्याय् हानं मेगु विवाद

न्हूगु संविधानय् शासकीय स्वरुप गज्याःगु जुइमाः धइगु खँयात कयाः एमाले दुने तःधंगु मतभेद ब्वलंगु दु। एमालेपाखें संविधानसभाया चुनावय् प्रस्तुत याःगु घोषणापत्रय् राष्ट्रपति व उपराष्ट्रपति संसदं निर्वाचित यानाः प्रधानमन्त्री छम्ह तप्यंक जनतां हे ल्ययेगु प्रणाली उल्लेख यानातःगु खः। अबलय् एमालें थःपिंसं न्ह्यःने हःगु थ्व प्रणाली मेपिनि स्वयां तसकं बिस्कं व मौलिक खः धकाः गौरव नं याःगु खः। तर आः वयाः धाःसा एमालेया हे छुं नेतात (खास यानाः चुनावय् बूपिं) थ्व प्रणाली मजिउ धकाः थुकिया विरोधय् वनाच्वंगु दु। उमिसं थःगु हे पार्टीं प्रस्ताव याःगु प्रणालीयात नं आः असफल यायेमाः धकाः लगे जुयाच्वंगु दु ।

एमालें प्रधानमन्त्री निर्वाचित जुइमाः धाः थें माओवादीं राष्ट्रपति निर्वाचित जुइमाः धइगु प्रणाली प्रस्ताव याःगु दु। थ्व निगुलिं प्रणालीया मुख्य उद्देश्य धइगु सरकार चले याइम्ह मुख्यम्ह मनू बल्लायेमाः व देशय् स्थिर सरकार दयेमाः धइगु हे खः। नेपाःया बहुदलीय प्रणाली विफल जूगुया मुख्य कारण याकनं सरकार गिरे यायेगु व दयेकेगु कासा जुयाच्वनीगुलिं खः। थ्व ज्यां यानाः सरकारय् वनेगु लागिं नं दलया नेतातय्के भारतया न्हिप्यं ज्वं वनेगु प्रवृत्ति ब्वलना वल। आवंलि देशय् थज्याःगु स्थिति मवयेमा धकाः निर्वाचित सरकार प्रमुखया प्रस्ताव न्ह्यःने वःगु खः। स्वयं कांग्रेसया हे गुलिखे बुद्धिजीवी सभासद्त थ्व प्रणालीया पक्षय् दु। एमाले दुने थज्याःगु प्रणालीयात तकं विरोध याइपिं पिहां वःगुलिं एमाले आः गुलि दक्षिणपन्थी जुइधुंकल धइगुया चिं खः ।

More Stories Like this