अयोग्य लडाकु मातृकापाखे

शिविर त्वःतेवं मातृकाया सम्पर्कय्
अयोग्य धाःपिं नं युद्धय् पोख्त

येँ (सन्ध्या टाइम्स)/देय्या थीथी शिविरय् तयातःपिं माओवादीया अयोग्य लडाकुत शिविरं चीका छ्वःलिसे उपिं धमाधम मातृका यादवं नेतृत्व यानाच्वंगु 'नेकपा (माओवादी)' दुने दुहां वनाच्वंगु खँ सीदुगु दु ।

आः थथें उलि अप्वः संख्याय् दुहां वंगु ला मदुनि तर मातृकालिसे न्हापांनिसें स्वापू दुपिं छुं छुं अयोग्य लडाकुत धाःसा मातृकाया माओवादीइ वनाच्वंगु खँ सूत्रं धाःगु दु। यदि आः वंपिं अयोग्य धाःपिं लडाकुत अन वनाः ज्या याये फइगु वातावरण दत धाःसा उमिसं मेपिं नं अयोग्यतय्त अन दुत यंकेगु ज्या यायेफु धाःगु दु ।

सूत्रया कथं थीथी शिविरं लिकया हःपिं अज्याःपिं अयोग्य लडाकुतय्त सम्पर्क तयाः थःगु पार्टीइ हयेगु लागिं मातृका यादवं नं कुतः यानाच्वंगु दु। शिविरं लिकया हयेवं उमित स्वापू तयाः थःथाय् साला हयेगु लागिं मातृकाया मनूतय्सं उमित स्वापू तयेगु ज्या यानाच्वंगु दु ।

आः अयोग्य धकाः लिकया हःपिं लडाकुतय्त थनिं प्यदँ न्ह्यः जनयुद्ध अन्त्य जूगु न्हि तक १८ दँ मक्यंगु धइगु लिधंसाय् अयोग्य ठहर याःगु खः। आः जनयुद्ध क्वचाःगु हे प्यदँ फुइधुंकल। अबलय् न्याला खुलाया उमेरं जक १८ दँ मक्यंपिं लडाकुत आः म्होतिं नं २२ दँ दयेधुंकूगु दु। उकिं आःया ल्याखं उमित अयोग्य धायेगु पाय्छि मजू। लिसें स्वदँ तक थीथी शिविरय् च्वनाः उमिसं थीथी कथंया सैनिक तालिम नं कायेधुंकूगु दु। उमित शिविरय् तयाः नं माओवादीं गुरिल्ला युद्धया हे थीथी कला बारे तालिम बिउगु खः। उमिसं अन दुने च्वनाः आत्मसुरक्षा सम्बन्धी सेक्युरिटी तालिम, युद्ध क्षेत्रय् याइगु लडाइँ सम्बन्धी ब्याटल तालिम, विद्युतीय धराप (एम्बुस) तयेगु व एम्बुसपाखें बचे जुइगु तालिम, सामान्य ल्वाभः दयेकेगु तालिम, गुरिल्ला वार ट्रेनिङ्ग आदि थेंज्याःगु तालिम कयातःगु दु। लिसें अन दुने उपिं पूर्ण रुपं सैन्य अनुशानस व सैन्य शैलीं हे च्वंगु जुयाः उमिगु स्वभाव, आनीबानी व आँट नं सेनाया स्वयां कम मजू ।

शिविरय् तालिम कयातःपिं थ्व अयोग्य धाःपिं लडाकुतय्सं थःपिंसं अन सयेकूगु तालिम आः गनं नं माल धाःसा कुशलतापूर्वक प्रयोग नं यायेफुगु खँ धाःगु दु ।

सूत्रं धाः कथं यदि शिविरं लिकया हःपिं थज्याःपिं लडाकुत धाःसा थःपिंसं तालिम हे बी म्वायेक योग्य गुरिल्लात चूलाइ धकाः मातृका यादवया पार्टी उमित थःगु पार्टी दुकायेत ब्वाँय् जुयाच्वंगु दु ।

माओवादीतय्सं फुक्कं शिविर पाखें यानाः कुल ४००८ म्ह अयोग्य लडाकुत लिकायेगु ग्वसाः ग्वयातःगु दु। शिविरं पिहां वयेवं थुमित दछि तक थीथी निकायं निगरानी तयेगु खँ धाःगु दु ।