संविधान दयेकेगु ज्याय् हानं मेगु विवाद
संविधान दयेकेगु लागिं तयार यानातःगु कार्यसूची हानं छक्वः संशोधन जूगु दु। म्हिगः जूगु थ्व संशोधन गुक्वःगु खः। संविधान दयेकेगु झ्वलय् थुबलय् थ्व थ्व यायेगु धकाः तयार यानातःगु थ्व कार्यसूचीइ जुयाच्वंगु थ्व संशोधन खनाः मनूतय्सं संविधान इलय् वइ धकाः यानाच्वंगु शंकायात अझ गाढा याना बिउगु दु। तर संविधान दयेकेगु ज्याय् वयाच्वंगु ढिलाईया कारणं थ्व संशोधन मयासें मगाःगु छगू बाध्यता नं खः ।
संविधानसभाया ११ गू थीथी विषयगत समितितय्सं थःपिनि प्रतिवेदन बीधुंकूगु दु। तर छुं हे समितिया प्रतिवेदन विवादमुक्त धाःसा मजू। फुकलीसं हे समस्या दु। गुलिखे विषयय् ला संविधानसभा दुनेया पार्टीतय् दथुइ जक विवाद मखु छगू हे पार्टी दुने नं मतैक्य जुइ मफयाः अनेक कथंया विवाद पिहां वयाच्वंगु दु। गथे कि शासकीय स्वरुपयात कयाः एमाले दुने पिहां वयाच्वंगु विवादयात हे कायेफु। एमालें निर्वाचित प्रधानमन्त्री प्रणाली लागू यायेगु धकाः संविधानसभाया चुनावय् घोषणापत्र हे सार्वजनिक याःगु खःसां अन दुनेया छगू गुटं आः वयाः घोषणापत्रय् उल्लेखित उगु प्रणालीयात त्याग यानाः मेगु हे प्रणाली अवलम्बन यायेमाः धकाः जिकिर यानाच्वंगु दु। संविधान दयेकेगु ज्यायात आः थज्याःगु विवादं हानं संकटय् लाका बीगु खतरा पिहां वःगु दु। यदि दलतय् दथुइ थज्याःगु विवाद कायम हे जुयाच्वन धाःसा थ्व कार्यसूचीया समयतालिकायात हानं नं संशोधन मयासें गाइ मखु गुगु बांलाःगु संकेत मखु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
