एमाले दुने नं भारतया चलखेल
स्थिर प्रम महयेकेगु दाउ
माधव नेपाल नं ओलीया पक्षय्
येँ (सन्ध्या टाइम्स)/देशय् स्थिर सरकार गठन जुइमा धकाः एमालेपाखें प्रस्ताव यानातःगु प्रत्यक्ष प्रधानमन्त्री प्रणालीयात विफल यायेगु लागिं अन दुनेया भारतपरस्त धयातःपिं नेतात सक्रिय जुया वःगु खँ सूत्रं धाःगु दु ।
एमालें संविधानसभाया चुनावय् नं राष्ट्रपति व उपराष्ट्र संसदपाखें समावेशी ढंगं ल्ययेगु व प्रधानमन्त्री छम्ह चाहिं प्रत्यक्ष चुनावं ल्ययेगु धइगु प्रणाली बारे उल्लेख यासें घोषणापत्र जारी याःगु खः। सरकार प्रमुखया हैसियत दुम्ह प्रधानमन्त्री छम्ह जनतां तप्यंक ल्ययेगु ज्या जुल धाःसा देशय् न्यादँ तक सरकार क्वःथलेगु समीकरणया कासा जुइ फइ मखु धइगु एमालेया दावी खः। थथे जुल धाःसा देशय् स्थिर सरकार दयेके फइ। तर नेपालय् स्थिर सरकार वल धाःसा दकलय् थाकुगु अवस्था भारतयात वइ छाय्धाःसां सरकार स्थिर जुइ सातकि विपक्षी अथवा सत्तारुढ पार्टी दुनेया छुं मनूतय्त ल्ह्वनाः दथुइ हे सरकार क्वःथलेगु खेल वं म्हिते खनी मखु। सरकारयात दथुइ हे क्वःथलेगु अवसर दत धाःसा वयात सरकार गिरे याना बी धकाः ख्यानाः जूसां थम्हं धाःथे याका तये फइगु जुइ। उकिं थौंकन्हय् एमाले दुने भारतपरस्त धइगु द्वपं दुपिं केपी ओली व वय्कःया गुटं थ्व प्रणालीया विरोध यानाः कांग्रेसं धाःथें संसदीय प्रणालीइ हे वनेमाः धकाः सः तयाहःगु दु ।
कांग्रेसं धाः थेंज्याःगु संसदीय प्रणालीइ वनेमाः धइगु पक्षय् आः प्रधानमन्त्री माधव नेपाल नं वनेधुंकूगु दु। प्रधानमन्त्री जुइधुनेवं वय्कलं थःगु बिचाः हिउगु खँ सूत्रं धाःगु दु।
कांग्रेसं धाःसा संसदपाखें ल्यइम्ह प्रधानमन्त्रीयात दथुइ हे हिला छ्वइ धकाः संसदीय प्रणालीयात नं भचा सुधार यानाः गुगुं नं सरकारया विरुद्ध दछि तक अविश्वासया प्रस्ताव तये दइ मखु धइगु छगू लाइन नं तःगु दु। तर दछि तक अविश्वास प्रस्ताव तये मदु धाःसां थुकिं न्यादँया दुने न्यागू सरकार गठनया सम्भावना धाःसा जीवित हे जुयाच्वनी ।
तर कांग्रेसं संसदीय प्रणालीयात सुधार याना धाःसां कांग्रेस दुनेया हे बुद्धिजीवी धकाः परिचितपिं नरहरि आचार्य, प्रदिप गिरी आदि लगायत २५ म्ह सभासद् एमालें धाः थें हे निर्वाचित प्रधानमन्त्रीया पक्षय् दु ।
उखे माओवादीं नं स्थिर सरकार जुइमाः धइगु हे तर्क तसें निर्वाचित राष्ट्रपतिया बिचाः न्ह्यःने हःगु दु। तर निर्वाचित राष्ट्रपतिया पक्षय् माओवादी याकःचा जक लाःगुलिं थ्व बिचाः त्याइगु सम्भावना म्हो जक दु। थज्याःगु अवस्थाय् माओवादीं निर्वाचित प्रधानमन्त्री प्रणालीयात भोट बिल धाःसा थ्व प्रणाली त्यायेफु। सूत्रया कथं निर्वाचित प्रम धायेसातकि थ्व संसदीय व्यवस्था मखइगु जूगुलिं माओवादीयात थ्व प्रणालीइ भोट बीत थाकुइमाःगु अवस्था मदु ।
