'नेपालमण्डल'यात मोर्डन नेवा: ईङ्गलिस स्कुलया भिंतुना

नेपालमण्डल डट कम निदँ क्यंगु लसताय् मोर्डन नेवा: ईङ्गलिस स्कुलपाखें नेपालमण्डल पुचःयात भिंतुना सन्देश प्राप्त जूगु दु । मोर्डन नेवा: ईङ्गलिस स्कुलया प्रिन्सिपल दिपक तुलाधरं व्छया हयादीगु भिंतुना सन्देशय् धयातःगु दु, 'दच्छि फुना निदँ क्यंगु लसताय् भिन्तुना दु ! थ्व वेभसाइत अति हे बांला जू, अले थीथी नेवा: पत्रिका व गतिविधि त थुकिइ ब्वनेदुगु न्ह्यैपुगु खँ ख: । थुकिया निंतिं छिकपिं सकलसित सुभाय् दु ।'

भितुना: सन्देशय् न्ह्यने न्ह्यथनात:गु दु, 'नेवा:पत्रिका अनलाइन ब्वनेदया: साप हे अ:पुया च्वंगु दु तर थथे सितिक्कं पत्रिका ब्वनेदया च्वंगु धैगु ब्वनामि पिनिगु निंतिं ला किफायत जुइ, तर पत्रिका पिकाइपिं व वेभसाइत न्ह्याका च्वनादिइपिं छिकपिन्त गुकथं आर्थिक फाइदा जुइ ? धैगु न्ह्यस: जिगु नुगलय् बरोबर वया च्वं । आर्थिक तिब: मदयकं छुं नं ज्या निरन्तर याये थाकुइ फु । जि छम्ह शुभचिन्तकया नातां थ्व खँ न्हयथनागु ख: ।'

वयेकलं नेवा:पत्रिका धेबा पुला: स्वयेगु सिस्टम दयेके मा:गु खँय् ब: बियादिसें वेभसाइतयात व्यवसायिक रुपं न्ह्या:केफुसा: वेभसाइतया न्ह्याकामियात नं बांलाइगु व नेवा: पत्रिकायात नं बांलाइगु खँ सन्देशय् न्ह्यथंनादीगु दु ।

अथेहे सन्देशय् 'कम शुल्कं नेवा: पत्रिका अनलाइन स्वये दइबलय् नेवा:पत्रिकाया सर्कुलेसन नं संसार भर थ्यनिइ । खला मेमेगु पत्रिका सितिक्कं हे अनलाइन स्वयेदु, नेवा: पत्रिका जक छाय् धेबा पुला स्वयेगु ? धाइपिं नं छम्ह निम्ह दइ, तर नेवा:पत्रिका व वेभसाइतयात बांलाका यंकेत व्यवसायिक याये हे मा:थें च्वं ।' खँ न्ह्यथंनात:गु दु ।

'धेबा पुला अनलाइन पत्रिका स्वये न्ह्या:पिं नं यक्को दु । जिं नं ससुल्क ग्राहक दयेकेत ग्वाहाली यायेगु मन दु । थ्व सम्बन्धय् सन्ध्याटाइम्सया भाजु सुरेस किरण व लायकूया भाजु नरेश बीर नाप नं छक्व: निक्व खँ जूगु दु । न्ह्याथे याना नं थज्यागु वेभ साइत बांलाक्क न्ह्याना च्वने फयेमा धैगु जिगु मनसुवा: ख: । हाकनं छक्व: भिनतुना लिसें सुभाय् ।' सन्देशय् न्ह्यथनातःगु दु ।

More Stories Like this