बंगलादेशय् नं भारतया मिखा

डी.आर. खड्गे

बंगलादेशया राजनीतिं यक्व आरोह अवरोह जुयाच्वंगु दु। थन गबलें सैनिक शासनं सत्ता चले यानाच्वनीसा गबलें जनताया शासन धकाः पार्टीया नेतातय्सं सत्ता सञ्चालन यानाच्वनी। चाहे सैनिक शासकं जुइमा चाहे पार्टीया नेतातय्सं जुइमा उपिं देश विकास यायेगुली ध्यान मबिसे खालि व्यक्तिवादी सोचं ज्या यानाच्वंगु खनेदु। पार्टीया खँ ल्हायेबलय् अनं निगू शक्तिशाली पार्टी उदय जुयाच्वंगु दु। छगू शेख हसिनाया पार्टी अवामी लिग, मेगु खालिदा जियाया बंगलादेश नेशनालिस्ट पिपुल्स पार्टी। थ्व निगू पार्टी पालंपाः शासन यानाच्वनी। गबलें खालिदा जियाया पार्टीं चुनाव त्याकाः शासन यानाच्वनीसा गबलें शेख हसिनाया पार्टीं अत्यधिक बहुमत हयाः शासन यानाच्वनी। निगू पार्टी बाहेक मेगु पार्टीत नं मदुगु मखु तर मेमेगु पार्टीया देय्न्यंकं संगठन विस्तार जुयाच्वंगु मदु। अज्याःगु पार्टीत खः, बंगला कम्युनिष्ट पार्टी व मेगु जातिवादी मुस्लिम पार्टीत ।

वंगु दँय् बेगम खालिदा जियाया पार्टी ततःधंगु भ्रष्टाचार यात धइगु राजनीतिक मुद्दा ज्वनाः शेख हसिनाया पार्टी चुनावी मैदानय् कुहां वल, व उकी वं बहुमत हयाः चुनाव नं त्याकल। आः नं शेख हसिनाया पार्टीं हे सरकार चले यानाच्वंगु दु। बंगलादेशी जनता शेख हसिनाया पार्टी खनाः दिक्क जुयाच्वंगु दु। दिक्क जुयाच्वंगुया कारण खः, छगू ला थ्व पार्टीया नेतात नं भ्रष्टाचारय् लगे जुयाः देय्यात बर्बाद यानाच्वंगु दु। मेगु, थ्व पार्टी भारतया इशाराय् प्याखं हुलाच्वंगु दु। बंगलादेशी जनतां शेख हसिनायात बौ मदुम्ह शेख मुजिबर रहमानयात नं भारतपरस्त नेता धकाः द्वपं बीगु यानाच्वंगु दु ।

प्रकृतिया नियम धाये ला अथवा प्राणीया हिंस्रक स्वभावया कारण धाये, छम्ह शक्तिशाली व्यक्तिं कमजोर व्यक्तियात सदां दमन याना हे च्वनी। बंगलादेशया इतिहासय् नं थज्याःगु घटना आपालं जुयाच्वंगु खंकेफु। न्हापा शक्तिशाली पाकिस्तानी सैनिक शासकं पूर्वी पाकिस्तान (बंगलादेश) या जनतायात दमन, शोषण व भेदभाव याना वयाच्वंगु खः। जब सन् १९५६ सालय् संविधान दयेकेगु झ्वलय् बंगलादेशया जनतां बंगाली भाषाया नं संविधानय् दुथ्याकेमाः, थ्व भाषायात राष्ट्रिय मान्यता व सुविधा बीमाः धकाः संघर्ष यात, व संघर्ष याःपिंत सैनिक शासनं दमन यानाः खत्तम यायेगु कुतः यात। नेतातय्त चरम दमन याःगु कारणं यानाः थ्व नेतातय्सं बंगलादेश बिस्कं देश हे माः धइगु माग ल्ह्वनाः सशक्त आन्दोलन न्ह्याकल। जब दमन तसकं हे तच्वया वल तब सन् १९७१ य् भारतीय सेना दुहां वनाः पाकिस्तानी सेनायात बंगलादेश त्वःताः पिहां वनेत बाध्य याना बिल। व, बंगलादेश स्वतन्त्र जूगु घोषणा यात। बंगलादेशया न्हापांम्ह राष्ट्र प्रमुख खः शेख मुजिवर रहमान। वय्कलं पूरा प्यदँ अन शासन यात तर देय्यात विकासया लँय् मयंकूगु कारणं शेख मुजिवर रहमान खनाः जनता निराश जुल। शेख मुजिवर रहमानयात नं जनतां भारतं धाः थें प्याखं हुलीम्ह धकाः द्वपं बिल। आखिरय् सन् १९७५ य् छगू सैनिक विद्रोह जुयाः शेख मुजिवर रहमानयात परिवारयात हे स्याना बिल। सैनिक शासकया ल्हातय् सत्ता लाः वन। सैनिक शासकं नं देय्यात विकास यायेगु मस्वसे खालि जनतायात शोषण व दमन यायेगुली नं ध्यान केन्द्रित याःगुलिं जनतां हानं छक्वः प्रजातन्त्र व मानव अधिकारया निंतिं संघर्ष यात ।

बंगलादेशया लागिं दुर्भाग्य थ्व खः कि अन गबलें सैनिकं शासन न्ह्याकी, गबलें नागरिक सरकार धकाः पार्टीतय्सं सत्ता न्ह्याकी तर देशयात विकास यायेगु ज्या धाःसा न सैनिक शासनं यात, न नागरिक शासन धाःपिं पार्टीतय्सं हे यात। छगू विकास ला जुल धायेमाः, व खः भ्रष्टाचारया चरम विकास। थुकिं यानाः छुं छुं व्यक्ति तसकं धनी जुयाच्वंगु दुसा आपालं जनता धाःसा गरीबीया क्वय् हे लानाच्वंगु दु। बंगलादेशय् भ्रष्टाचार थुलि अप्वयाच्वंगु दु कि उकिया हा राजनीतिक पार्टीया उच्चतह तकं थ्यनाच्वंगुलिं भ्रष्टाचार निवारण यायेत गठन यानातःगु नियन्त्रण आयोग निकम्मा साबित जुयाच्वंगु दु। कमिशन व भ्रष्टाचारं देय् स्यनाच्वंगु कारणं जनतां पार्टीया नेतातय्त नं विश्वास यायेगु त्वःता हयाच्वंगु दु। अविकसित देश स्यंगु नेतात स्वार्थी, लालची व स्तरहीन जूगुलिं नं खः। थुकिं यानाः उमित विदेशं प्याखं हुइकातःगु दु। नेतात खराब धकाः जनतां सिउसां नं चुनावया इलय् वहे नेतातय्त भोट बीत जनता बाध्य दु। बंगलादेशय् नं थ्वहे स्थिति दु। अन शेख हसिनाया पार्टी अवामी लिग, खालिदा जियाया बंगलादेश नेशनालिस्ट पार्टीयात नं जनतां बाध्य हे जुयाः जक भोट बी मालाच्वंगु खः। सन् २००९ सालया चुनावय् हसिनाया पार्टी दथुइ तःधंगु टक्कर जुल। हसिनां थः विरोधी पार्टीयात पाकिस्तानया लँपुइ वनाच्वन धकाः आरोप बिल, खालिदा पाकिस्तान थें जुइत स्वयाच्वन धकाः द्वपं बीगु याना हल। पाकिस्तान थें चरमपन्थीतय्त सुरक्षा बियाच्वंगु जक मखु कानुनी व्यवस्थायात तकं ध्वस्त याना बिल धाल। बेगम खालिदा जियां नं हसिनायात अज्याःगु हे आरोप बिल। वयात भारतपरस्त नेता खः, थ्व पार्टी त्यात कि बंगलादेशया स्रोत फुक्कं भारतं काइ, जलस्रोतय् भारतं अधिकार जमे याइ धकाः द्वपं बीगु यात। तर चुनावाय लिच्वः कथं शेख हसिनाया पार्टीयात अत्यधिक बहुमत बिल। हसिनां बंगलादेशय् शासन शुरु यात ।

वंगु वालय् शेख हसिना भारत भ्रमण वनाच्वंगु इलय् बेगम खालिदां चेतावनी बिल। यदि भारतयात हित व बंगलादेशयात हानी जुइगु सम्झौता याना वल धाःसा तःधंगु आन्दोलन यायेगु जुइ धकाः ख्याच्वः बिल। बेगम खालिदां थ्व नं धाल, भारतया उद्देश्य बंगलादेशया उर्जा श्रोत ल्हातय् लाकेगु खः। अथे हे खालिदां गंगा खुसिया लः बाँडफाँडया सम्झौतां बंगलादेशयात तःधंगु हानी जुयाच्वंगु नं धाल।
शेख हसिनाया थ्व भ्रमणं भारतयात अझ छु छु अधिकार बीगु जुइ धकाः शंकाया दृष्टिकोणं स्वयाच्वंगु दु। शेख हसिनां गुलिं नं सम्झौता याना वल उकी अप्वः यानाः भारतयात जक फाईदा जुइगु खनेदु। अले व सम्झौता खः अपराधिक गतिविधियात बंगलादशेया भूमि प्रयोग याके मजिउगु।
भारत गुलि चलाख धयागु खँ थ्व सम्झौता स्पष्ट याःगु दु। भारतं जःलाखःला देय्यात दुःख बीगु ज्या यानाच्वंगु दु, तर थ्व खँ भारतं मसिउ पहः यानाच्वंगु दु। झीगु देशय् नं थ्व हे स्थिति दु। भारतया भूमिपाखें आतंकवादी ज्या जुयाच्वंगु दइ तर नेपाःया भुमि भमिइ भारत विरोधी ज्या याके मजिल धकाः दबाव बियाच्वनी ।

More Stories Like this