जातीय प्रदेशयात जातिपाखें हे विरोध

राज्य पुनर्संरचना समितिपाखें आः नकतिनि पारित याःगु १४ गू जातीय प्रदेश सहितया नक्सायात फुक्क हे जातीय समुदायतय्सं विरोध याना हःगु दु। नेवाःतय्सं समग्रया स्वरुप पाय्छि जूसां उकी नेवाःतय्त बियातःगु भूमि पर्याप्त मजू धयाहःगु दुसा तामाङतय्सं नं थःपिनि पुलांगु भूमि क्वपालाः मेगु प्रदेशय् तयेयंकल धकाः विरोध प्वंकूगु दु। उमिसं ला उगु खाकायात सतकय् तयाः च्याके नापं धुंकूगु दु। अथे हे लिम्बुतय्सं नं पुलांगु लिम्बुवान भूमियात कुचा यानाः मेमेगु प्रदेशय् स्वाये यंकल धकाः विरोध याःगु दुसा मधेशवादी दलतय्सं नं थ्व खाकापाखें थःपिनि माग पूरा मजू धकाः उकियात विरोध यायेधुंकूगु दु। थ्व अवस्थायात स्वयेगु खःसा आः जातीय रुपं तयार याःगु थ्व खाका सुं हे जातीय समुदाययात स्वीकार्य मजूगु प्रस्ट खने दत। थुकिं राज्य पुनर्संरचना समितिपाखें तयार याःगु खाका विवादय् लाःवंगु दु ।

वास्तवय् थःपिनि नामय् निर्माण जुइत्यंगु प्रदेशतय्त सम्बन्धित जातिया पुचःतय्सं हे थथे विरोध यानाहःगुया मू कारण धइगु संविधानसभाय् थज्याःगु जातीय पुचःतय् प्रतिनिधित्व मदुगुलिं खः। संविधानसभाय् गुलि नं जातिया दुजःत दु उपिं थःथःपिनि जाति सिबें नं पार्टीया प्रतिनिधि जुयाः जक वनाच्वंगु कारणं उमिसं जातिया खँ अन तयेगु सम्भावना मदु। उकिया हे लिच्वः आः पिहां वःगु खः। थ्व खाकायात संविधानसभां स्वीकार याःसां आः जातीय पुचःतय्सं स्वीकार याइगु सम्भावना म्हो जक दु। उकिं संविधानसभां थुकियात अन्तिम रुप बी न्ह्यः थ्व जातीय पुचःतय्त निं सःताः राय कायेमाःगु आवश्यकता दु ।

More Stories Like this