विशाल बजारय् गोलीं कयेकल
यलंनिसें लिउलिउ वयाः लुटेयायेगु कुतः
येँ (सन्ध्या टाइम्स)/थौं सुथय् येँया विशाल बजारया अन्डरग्राउण्ड दुने गोलीं कयेकूगु दु। लुँ व्यापारी प्रकाश राजभण्डारी व वय्कःया जहान लिपिसा राजभण्डारीयात म्हसिउपिं मनूतय्सं गोलीं कयेकाः उमिके च्वंगु ब्याग छगः लाकाः बिसिउँ वंगु खः ।
घटना विवरण कथं यलया प्रकाश राजभण्डारी व वय्कःया जहान बा ६ च ६१९० नम्बरया गाडीइ च्वनाः वयाच्वंगु व गाडी थनया विशाल बजाःया अण्डरग्राउण्डय् पार्किङ्ग यानाः पिहां वयाच्वंपिं इमित यलंनिसें हे लिउलिउ वयाच्वंपिं अले विशाल बजारय राजभण्डारीपिं थ्यने न्ह्यः हे अन थ्यंकाच्वंपिं लुटेरातय्सं आकाझाकां गोलीं कयेकल। इमिसं पेस्तोलं छ्यनय् दाया घाःपाः यानाः निगः ब्याग मध्ये छगः ब्याग लाकाः बिसिउँ वंगु खँ स्थानीय मनूतय्सं धाःगु दु ।
लुटेरात निगः वँचुगु पल्सर मोटरसाइकलय् च्वनाः वःगु खःसा इमित मालेगु ज्या प्रहरीं यानाच्वंगु दु। प्रहरीं आः घटनास्थलय् गोलीया खोका मालेगु व अनुसन्धानया ज्या नं न्ह्याकाच्वंगु दु। थथे सुथय् हे विशाल बजारय् गोली चले जूगुलिं उगु लागायापिं मनूत आतंकित जूगु खः। व्यापारी राजभण्डारीं धाःसा लुटेयाना यंकूगु ब्यागय् भ्वं जक दुगु खँ धाःगु दु ।
