संविधान च्वज्या हानं ठप्प
सभापति मदयाः ज्या न्ह्याः मवन
संविधान दयेकेगु लागिं गठित थीथी समितिया सभापतित ल्ययेगु ज्या अझं मजूगु कारणं संविधान च्वज्या हानं छक्वः थाति लाः वंगु दु । सभापति ल्ययेगु लागिं बियातःगु तिथि प्यक्वः तक लिछ्यायेधुंकूगु दुसा आः थ्वहे वइगु माघ २९ गते बिउगु तिथि कुन्हु न्ह्याथे यानाः नं सभापति ल्ययेमाःगु खँ संविधानसभा सचिवालयं धाःगु दु । संविधानसभाया बैठक नं वकुन्हु हे च्वनेगु व वकुन्हु हे सभापतिया चयन यायेगु खँ धाःगु दु । यदि वकुन्हु नं सभापति ल्यये मफुतधाःसा बियातःगु ईया दुने संविधान च्वये मफइगु ख्याच्वः संविधानसभा अध्यक्ष सुभाष नेम्बाङ्गं बीधुंकूगु दु ।
सभापतिया लागिं कन्हय् तकया दुने नां बीत फुक्क दलतय्त इनाप यानातःगु दु । तर दलतय्सं धाःसा भागबन्डाया खँ मिले मजुयाः आः तकं नां क्वःछी मफुनि । सभापतिया नां बीगु लागिं थीथी दलतय् दथुइ जक मखु दलतय् दुने हे नं आन्तरिक कचवं पिहां वयाच्वंगु जानकारी सूत्रं बिउगु दु ।
दलतय्सं थुकिया निंतिं नं सहमति कायम याये मानिगु जूगुलिं थःपिंदथुइ छगू चरण बैठक च्वनेमालीगु खँ धयाच्वंगु दु । तर अध्यक्ष सुभाष नेम्बाङ्गं आः बैठक सःताः सहलह याना च्वनेगु ई मदुगु जूगुलिं नेतातय् दथुइ फोन-फोनं हे खँल्हाबल्हा यानाः जूसां नां छ्वया हयेमाल धकाः आग्रह यानादीगु दु ।
सभापति ल्ययेगु ज्या मजूगुलिं संविधान च्वयेगु ज्या नं न्ह्यःने न्ह्याये फयाच्वंगु मदुनि । सभापति पदय् तःधंगु दलतय्गु दावी व कचवनं यानाः ज्या न्ह्यःने वने मफयाच्वंगु खः । २९ गते लिबाक च्वनाः जूसां सभापित ल्ययेगु तयारी जुयाच्वंगु दु ।
एकीकरणय् लिच्वः
उखे माघ २९ गते कुन्हु हे सभापति ल्ययेगु तिथि क्वःछिउगु कारणं माओवादी व एकता केन्द्र मशाल एकीकरण यायेगु धकाः क्वःछिनातःगु ज्याझ्वः प्रभावित जुइफुगु खँ धाःगु दु । वकुन्हु हे येँय् छगू तःधंगु सभा यानाः निगू पार्टी एकीकरण यानाः पार्टीया नां हे 'एकीकृत नेकपा (माओवादी)' तयेगु धकाः सहलह जुयाच्वंगु खः । तर वकुन्हु फुक्क नेतात संविधानसभाय् व्यस्त जुइमालीगुलिं वकुन्हुया ज्याझ्वः लिछ्यायेफु धाःगु दु ।
