आम हड्ताल स्थगित याइगु
तर आन्दोलन धाःसा जारी
येँ (सन्ध्या टाइम्स)/राष्ट्रिय स्वाधिनता नापं नागरिक सर्वोच्चताया माग यानाः आन्दोलन याना वयाच्वंगु एनेकपा (माओवादीं) माघ १० गते लिपांनिसें यायेगु धयातःगु अनिश्चितकालिन आम हडतालयात आः थथेंया नितिं स्थगित याइगु संभावना अप्वयावःगु दु ।
स्वंगू दलया शीर्ष नेतात च्वनाः कांग्रेसया सभापति गिरिजाप्रसाद कोइराला नेतृत्वय् राजनीतिक समस्या समाधानया निंतिं उच्चस्तरीय संयन्त्र दयेकेधुंकूगु, थीथी खलः पुचःतपाखें नापनापं संविधानसभाय् दुथ्याःगु थीथी दलतय्सं आमहडताल मयायेत इनाप यायेधुंकूगुलिं आःया निंतिं उगु ज्याझ्वः स्थगित याइगु समभावना अप्वयावःगु दु धकाः माओवादीया छम्ह नेतां 'सन्ध्या टाइम्स'यात कनादीगु दु ।
माओवादीं आम हडतालया ज्याझ्वः मयाइगु जूसां माघ १० गते लिपां नं थःपिनि आन्दोलनयात धाःसा निरन्तरता बिया हे च्वनेगु निंतिं माओवादीं मेमेगु कथंया ज्याझ्वःत हइगु खँ नं धाःगु दु ।
सूत्रं धाः कथं राष्ट्रिय स्वाधिनताया निंतिं थौंकन्हय् देय्न्यंकं कार्यकर्ता परिचालन यासें न्ह्याकाच्वंगु अन्तर्क्रिया, सभा, प्रचार प्रसारया ज्याझ्वःयात हे निरन्तरता बियाच्वनीगु खँ नं धाःगु दु ।
