रक्षा मन्त्रीयात पदं लिकया छ्वयेमाः

माओवादीया लडाकुयात नेपाली सेनाय् समायोजन याये मजिउ धकाः रक्षा मन्त्री विद्या भण्डारीं बियादीगु धापुतिं देशय् तःधंगु तरंग हया बिउगु दु। थ्व नं वय्कलं थज्याःगु इलय् वयाः न्ववानादीगु दु गुगु इलय् कि नेपाली सेनाय् माओवादी सेना दुकाये मजिउ धइगु बिचाः तइम्ह भारतीय सेनाध्यक्षं हे नेपाः भ्रमण यानाच्वंगु दु। भारतीय सेनाध्यक्ष नेपाः भ्रमणय् वयाच्वंगु हे इलय् वय्कःयात हे ल्वय्क रक्षा मन्त्रीपाखें वःगु आकाझाकां वःगु थ्व अभिव्यक्ति भारतयात क्यंगु सम्भवतः आः तकया हे दकलय् निर्लज्ज भक्ति खः। छम्ह सेनाध्यक्षया न्ह्यःने नेपाःया रक्षा मन्त्री थेंज्याःम्ह मनुखं क्यंगु थज्याःगु भक्तिं सम्पूर्ण नेपाःमिया छ्यं क्वछुका बिउगु दु ।

झिदँ तक जनयुद्ध ल्वाःपिं माओवादी लडाकुयात गय् यानाः समायोजन यायेगु धइगु बारे निर्णय यायेत छगू विशेष समिति गठन यानातःगु दु। उकी सरकार व माओवादीया प्रतिनिधित नं च्वनाच्वंगु दु। यदि अज्याःगु समितिं बिउगु निर्णययात हे रक्षा मन्त्रीं स्वीकार मयायेगु खःसा थुकिं समितिया औचित्य समाप्त यानाः शान्ति प्रक्रियायात हे स्यंकीगु निश्चित दु। उकिं रक्षा मन्त्रीया थ्व अभिव्यक्तियात कयाः छुं पलाः ल्ह्वनेमाःगु दायित्व आः प्रधानमन्त्रीयाके वःगु दु। प्रधानमन्त्रीं या त थ्व अभिव्यक्तियात कयाः रक्षा मन्त्रीयात पदं बर्खास्त यायेमाः, यदि याये मफुगु खःसा थम्हं राजीनामा बीमाः। नितां मयायेगु खःसा थ्व प्रधानमन्त्री माधव नेपालया पदलोलुप प्रवृत्तिया नांगां प्रदर्शन जुइ, वय्कःया निकम्मापन थुकिं साबित याइ ।

More Stories Like this