कनिष्ठ व वरिष्ठया ध्याचू

अनाम

थ्व वरिष्ठ व कनिष्ठ धायेबलय् गनं ज्याकूया ज्यामि व हाकिम वा अफिस अफिसया कर्मचारी राष्ट्र सेवकतय्त संवोधन याःगु जुइ। वरिष्ठ व कनिष्ठया दथुइ दयेमाःगु सुमधुर सम्बन्ध खास यानाः सकल अफिसय् खने मदु। निथ्वःया दथुइ अप्वः यानाः कुंखिनेगु ज्या जुयाच्वनी। वरिष्ठया थःगु हे भनाई दइसा कनिष्ठया थःगु हे मयःम्ह कलाःया सासः नवः धाःथें वरिष्ठतय् मयःम्ह कनिष्ठं न्ह्याग्गु ज्या याःसां मयः, ज्या मसः, ज्या स्यं, ज्या याये मसः धकाः कुंखिनेगु ध्याचू नकेगु जक यानाच्वनी। खःगु ज्या याःसा यात धाइ मखु, लयताइ मखु प्रशंसा याइ मखु। थ्व प्रथा शायद नेपालय् जक मखु विकासशील देशय् जक मखु पश्चिमया विकासित देशनं दनिगु खःला? थ्व खं बांलाक जि ला मसिउ। थीथी देशय् चाहिलीपि वा संवंधित विषयया विद्यार्थीतय्सं जक बांलाक सी। जिं छगू विदेशी पश्चिमी देय्या सफू ब्वनागु व सफुली अन देय्यात खःला सकल देय्यात कयाः खः ला च्वयातःगु वरिष्ठ व कनिष्ठया दथुइ न्ह्याकातःगु ध्याचू टक ब्वना। व च्वसु कथं वरिष्ठ व कनिष्ठया बादविवाद थथे च्वयातःगु दु।
यदि छम्ह कनिष्ठं ज्या याकनं मयात। विस्तार यात। इलय् मयात धाःसा वरिष्ठं वयात धाइ - अल्छि, सुस्त ज्याठग। तर जब वहे ज्या छम्ह वरिष्ठ नं अथे हे याकनं मयात, ढिला यात, इलय् मयात धाःसा हाकिमं धाइ वं ला व ज्या बांलाक पूवंक भिंमभिं फुक्क सीकेया लागिं थुइकेया लागि अर्थात 'थरो' यानाः यायेत्यनागु धाइ ।

छम्ह कनिष्ठं छु नं ज्या धायेसाथ मयात वा वरिष्ठया आज्ञा पालन मयात धाःसा वयात अत्तेरी, अनुशासन मगाःम्ह धाइ तर अथे हे हाकिमं नं ज्या तुरुन्त मयात धाःसा हाकिम बेफुर्सत वा बिजी धाइ ।

जब छम्ह कनिष्ठं थम्हं परिस्थिति सीकाः थुइकाः हाकिमं मधाःसां माःगु ज्या खः धकाः न्ह्यः हे याना क्यनी, हाकिमं वयात अथे अर्‍हे मयायेकं ज्या याःपिं कनिष्ठतय्त धाइ आपाः अप्वः जुयाच्वने मते, स्मार्ट जुइ मते। जब अज्याःगु ज्या हाकिम वा वरिष्ठतय्सं याइ इपिं तसकं सःसिउपिं जुइ। बुद्धिमान जुइ। 'इनिसियेटिभ' जुइ ।

जब छम्ह कनिष्ठं ज्या यानाः आज्ञा पालन यानाः अनुशासनय् च्वनाः वरिष्ठयात खुसी याइ, लय् ताय्की वयात चाकरीबाज चापलुसिबाज धाइ। अथे हे जब छम्ह वरिष्ठ हाकिमं अथे हे बांलाःगु ज्या यानाः थः स्वयां च्वय् च्वंम्ह वरिष्ठयात खुसी याइ लय्तायेकि तब वयात तसकं ग्वाहालि याइम्ह, सहयोगी धाइ। 'कोअपरेटिभ'म्ह मनू धाइ ।

जब कनिष्ठतय्सं बांलाक ज्या यानाः मेहनत यानाः अफिसया नां तइ बांलाइ अज्याःगु कनिष्ठतय् ज्या वरिष्ठं ताःतक लुमंका तइ मखु। याकनं ल्वःमंका छ्वइ। अःखःबतं यदि छम्ह कनिष्ठं छुं ज्या स्यंकल द्वंकल धाःसा वरिष्ठतय्सं सदां लुमंका तइ। उकियात गबलें नं ल्वःमंकी मखु ।

थुपिं गुलि वरिष्ठ व कनिष्ठया सम्बन्धयात कयाः च्वयातःगु छगू ध्याचू। वास्तवय् थ्व ध्याचू मखु तथ्य खः। विदेशय् ला थथे निथ्वःया सम्बन्ध ख्वाउँ धाःसा विकसित देशया ला खँ हे मंत नेपाःया वरिष्ठ व कनिष्ठया सम्बधयात कयाः सुनां स्वइतं छुं नं धायेमाःगु आवश्यकता हे मदु। सकसिनं सिउ। थन ला छम्ह वरिष्ठया लागिं व कनिष्ठ जक ज्या लगे जुइ अनुशासित जुइ आज्ञाकारी जुइ गुम्ह कनिष्ठ थः वरिष्ठं धाःगु ज्या न्ह्यागु जूसां मिखा तिसिनाः याइ। अज्याःपिं जक वरिष्ठया लागिं भिंपिं कनिष्ठ जुइ। अन्यथा वरिष्ठया व्यक्तिगत ज्या वा हाकिमया शुभलाभया ज्या याइ मखुम्ह कनिष्ठ जुल कि व अफिसय् न्ह्याक्व हे बांलाक ज्या याइम्ह जूसां अनुशासित आज्ञाकारी जूसां वरिष्ठया लागि व कनिष्ठ मिखाया धू जुइ। गुल्सं बांलाम्ह भिंम्ह जुइ मखु ।

नेपाः विकास जुइ मफुगु, अफिस अफिसय् बांलाक ज्या मजुइगु, मन्त्रीतय्सं ज्या मयाः धकाः जब जनतां धाइ अले वरिष्ठ मन्त्रीतय्सं धाइ राष्ट्र सेवकं ग्वाहालि मयाः, कनिष्ठतय्सं ग्वाहालि मयाः। लोकतन्त्र वसेलि ला एकिकृत माओवादीं खुल्ला रुपं तप्यंक हे राष्ट्र सेवकतय्त द्वपं बिल। माओवादीं जक मखु आः ला मेमेपिंसं नं धायेगु याना हये धुंकल। अले मन्त्रीतय्सं वरिष्ठतय्सं थःगु स्वार्थया लागिं थःगु शुभ लाभया लागि कर्मचारीतय्त उखेथुखे सल्लाह यानाः थम्हं वा थःथम्हं धइथे दुम्ह तये हइ। मन्त्री न्हूम्ह वल कि वया अन्तर्गतया दक्व वरिष्ठ वा कर्मचारीतय् सरुवा याइ। राजीनामा बीकी। छकः ला मसिउ ल्वःमन सु कम्यूनिष्ट मन्त्री च्वंगु मेचय् फ्यतुइ मखु धाःम्ह मेम्ह छम्ह मन्त्री नं वल धाःगु न्यना। थथे देश विकासया लागि थःथःगु जक कचिंगः न्ह्यब्वयाः खास देशया कार्यक्रम न्ह्य मज्याकुसे देश विकास जुइ ला? वरिष्ठ व कनिष्ठतय् दथुइ सम्बन्ध सुमधुर मजुइकं ज्या जुइ ला? थ्व विषययात कयाः नं छगू आयोग गठन यायेगु खः ला? आयोग गठन यानाः वरिष्ठ व कनिष्ठया सम्बन्ध गथे जुयाः ख्वाउँ जुइ, गथे जुल कि क्वाइ धकाः नं अनुसन्धान यायेगु खःला ?

पञ्चायतया ई। छम्ह कर्मचारी अल्छि। गफ जक यानाः नइम्ह। हाकिमया मयःम्ह। अले मेम्ह छम्ह कर्मचारी गज्याःम्ह जुयाच्वन धाःसा हाकिमत पिहां वनेत हवाइ जहाजया टिकट न्याः वनीगु। अफिसया ध्यबा ज्वनाः वनीगु। तर व नेपाल वायु सेवा निगमय् धाःसा टिकट थिंकाः हइगु। ध्यबा फुक्क म्हिचाय् तइगु। गुलिखय् ध्यबा नये धुंकाः व सरुवा जुयाः मेगु थसाय् वन। छन्हु वायु सेवा निगम टिककया ध्यबा हि धकाः बिल सहित चिठ्ठी छ्वया हल। हाकिमत ला छक्क। ध्यबा बियां नं ध्यबा मबिसे टिकट कयाहःगु सिल। थ्व हे खँ व गफाडी कर्मचारीं सिल। अले वं हाकिमतय्त व ध्यबा असुल याना बी धकाः धाल। हाकिमं जिउ धाल। अले व गफाडी ठग कर्मचारीयात ज्वनाः ध्यबा असुल यानाहल। हाकिमत तसकं लय्ताल। खुसी जुल। अले व सुयां स्वये मयःम्ह गफाडी कर्मचारी सकल हाकिमतय्त यल। वइत गोर्खा दक्षिण बाहू बिल। थ्व क्रम आः नं दनि। अज्याःगु सम्बन्धया क्रम भंग जुयाः बांलाःगु सम्बन्ध मवयेकं देश विकास जुइ मखु ।

More Stories Like this