विद्याया खँय् विशेष समिति ठप्प
माओवादीपाखें कडा आपत्ति
येँ (सन्ध्या टाइम्स)/रक्षा मन्त्री विद्या भण्डारीं माओवादी लडाकुयात नेपाली सेनाय् समायोजन याये फइ मखु धकाः बियादीगु अभिब्यक्तियात कयाः थौं च्वंगु सेना समायोजन विशेष समितिया मुँज्याय् माओवादीया नेतातय्सं कडा आपत्ति प्वंकेगु ज्या जुल ।
थौंया मुँज्याय् वहे रक्षा मन्त्रीया खँयात कयाः जक ताःहाकः
तक कचमच जूगुलिं समितिया मुँज्या न्ह्याः वनेत तकं पंगः ब्वलंगु दु। उकिं थौंया मुँज्याय् छुं नं विषययात कयाः सहलह जूगु मदु। मुँज्या न्ह्यायेवं समितिया दुजः जुया च्वनादीपिं माओवादीया निम्ह नेता वर्षमान पुन व जनार्दन शर्मां रक्षा मन्त्रीया खँयात कयाः आपत्ति प्वंकादीगु खः ।
प्रधानमन्त्री माधव कुमार नेपालं रक्षा मन्त्री विद्या भण्डारीं गुगु कथं खँ ल्हात धइगु वय्कःया व्यक्तिगत विचाः जक खः धकाः म्हिगः हे मन्त्री परिषदं क्वःछीधुनागु जुयाः सेना समायोजन समितिया कार्ययोजना कथं हे न्ह्याः वनी नापं सरकारं नं ग्वाहालि याइ धयादीगु खः। तर माओवादीया नेतातय्सं व खँयात कयाः नं सहलह जुइमाः धकाः अडान तःगु खँ स्रोतं धाःगु दु ।
