न्यू नेपाल खिउँ नेपाल

- रत्न काजी शाक्य 'करोडपित'

जलश्रोतया दोश्रो धनी देश धाःगु नेपाल लोडशेडिङय् पहिला हे जुइ । जलश्रोतय् जक मखु 'जालश्रोत' चालश्रोतय् नं धनी जूगुलिं न्हि दश घण्टा अठार घण्टा तक मत स्यानाः रेकर्ड बे्रक यायेत्यंगु दु । थुलिं अप्वः गुलि भाग्यमानि नयाँ नेपालया झी जनतात । आः विजुलीया स्वीच स्याये च्याये यायेगु झन्झट पाखें मुक्त जुइत्यंगु दु । देशयात स्वीट्जरल्याण्ड दयेके मफुसां स्वीचअफ ल्याण्ड दयेका बिउगु दु । विद्युत् प्राधिकरणं विद्युत् पुरा अधिग्रहण यायेधुंकूगु दु । न्यू नेपाल ला खिउँ नेपाल ला का मतच्याः थलया लाइटय् छुं हे सीमदु । खिउँक पचिपचि यानाः देशय् विकास यायेमाःगु दु । खिउँथाय् गोली कयेकाः भाग्य चम्के यानादिसँ ।

दशौं हजार मनूया ज्यान वंक झिदँया जनयुद्ध याना वःपिंसं दश वर्षं हे दशहजार मेघावाट विजुली पिकायेगु धाःगु दश दिन हे मदुनिबलय् न्हि दश घण्टा लोडशेडिङ यायेमाःगु थ्व दश नम्बर हे नेपालीतय्गु लागि दशा जुल । सत्यया सराप धायेगुला मती हे खराब धाये प्रधानमन्त्रीं मस्र्याङदी जलविद्युत् उद्घाटन याये सातिक हे देशय् लोडशेडिङ बढे जुल । मस्र्याङदी मखु 'मतस्याना ति' जलविद्युत् धाःगु लात थें । लःया लेभल कम जुयाः विद्युत् उत्पादन कम जूगु धयाच्वंगु दु । लः कम मजुइगु नं गन खुसि फुक्क मिया नये धुंकल । न्ह्याम्हेस्यां न्ह्यागु याःसां जिउगु देशय् 'ल' कानून हे मरु । उत्पादन सिबें माग बढे जुयाः जक लोडसेडिङ याये माःगु मखु नेता हाकिमतय् खल्तीयागु भाग बढे जुयाः नं लोडसेडिङ बढे जूगु खने दु । देशय् थज्याःगु खल्ती याःगु लोडसेडिङ यायेमाःगु दु । देशय् थज्याःगु नक्सां उर्जायागु संकट वःसां नेतातय्सं दुरुजा नयेगु त्वःतूगु मखु । सत्ताया पुर्जा चले जुयां तुं च्वंगु दु । उद्योग धन्दा, कलाकारखाना, व्यवसाय चले यायेत जक विजुली माः का घूस कमिशन नयेत विजुली ला म्वाः । अझ च्यानाच्वंगु विजुली नापं स्यायेमाः । सरकारी ज्या ढिला-सुस्ति, आलताल याये नं जिल । मत हे मवः धकाः । लोडसेडिङला नेतातय्त सोर् हय् सत्र का । नेतातय्त ल्वःगु सेडिङ । नेतात मस्त जनता अस्त व्यस्त । मेगु खँ खिउँगु जंगलं वःपिंत विजुली मा हे माः धइगु नं मदु । जिपिं गुलितक खिउँक च्वनावया धकाः क्यनेत नं लोडसेडिङ याःगु खः लाकि ईपं उलिमछि वर्ष तकला खिउँक च्वनेफु धाःसा झी नं छकः खिउँक हे च्वना स्वयेगु ला? प्रचण्डं खिउँ नेपालयात हे संकेत याःगु खःला ?

छथ्वः मनूतय्सं धायेगु याना वयाच्वंगु दु थ्व चिम कम्पनित इनभर्टरवालातय्सं झी नेतातय्त चार्ज याना बिउगुलिं लोडसेडिङ बढे जूगु खः । नेतातय्सं धाइगु न्हापायागु सरकारं याना वंगु गल्तिं यानाः थौं थज्याःगु दुर्गति जूगु । स्वनिगलय् पिनें वःपिं मनूतय्गु लोडं यानाः नं लोडसेडिङ बढे जूगु खः । नत्र सा न्हापा न्हापा थपाय्सकं बढे मजू । तर दोष सुयांगु मखु सुद्र्यो याःगु खः । वं छाय् चान्हय् निभाः त्वइ मबी माल ?…

थुकथं लोडसेडिङया ई थपेजूगु जुलं जुयाच्वंगु दु । न्हूगु नेपालय् तुरुन्त तुरुन्त न्हू न्हूगु शेड्युल पिहां वयाच्वंगु दु । न्हिं बाह्र घण्टां हप्ताय् चौरासि घण्टा चौरासि व्याजन ? पुरे याये हयाच्वंगु दु । आः छिकिपिनि मस्तय्त आखः ब्वंकादी म्वाःल । वर्तमान नं अन्धकार भविष्य नं अन्धकार । नयां नेपाल न्ह्याः वन लाकि लिहां वन मतच्याःथल च्याकाः स्वयादिसँ । कलकारखाना बन्द व्यापार व्यवसाय बन्द । सरकार खनाः कुनुकुनु तं पिकानाः च्वनागु दु । थुपिं फुकं तं छथाय् मुंकाः लाखौं मेगावाट विजुली पिकानाः देशयात झलमल यायेमाल ।

More Stories Like this