संचारया संजाल दथुइ नेपालमण्डल डट कम

नेपाःया पत्रकारिता ख्यलय् नेपालभाषाया पत्रकारिता स्वंगूगु स्थानय् लानाच्वंगु दु । आःतले नेपालय् दर्ता जूगु पत्रिका ल्याः नीनिसःया हाराहारी थ्यनाच्वंगु दु । थुकिइ नेपाली भाषाया ८४.७६ प्रतिशत दुसा अंग्रेजी भाषं दर्ता जूगु २.४८ प्रतिशत गुगु निगूगु स्थानय् लानाच्वंगु दु । नेपालभाषां दर्ता जुयाच्वंगु २००९ सालं सिनें आःतक स्वीगुलिं मल्याक पत्रिका दु । गुगु प्रतिशतया ल्याखं ०.७४ प्रतिशत अथधयागु स्वंगूगु थासय् लानाच्वंगु दु । थ्व झीगु नितिं लसताया खँ खः ।

थौंया कालक्रमय् नेपालभाषा पत्रकारिता ख्यलय् थीथी पत्रपत्रिका पिदनाच्वंगु दु । समाचारप्रधान निसें कयाः मनोरंजनात्मक साहित्यिक सांस्कृतिक स्वरुप त थुकिइ दुथ्यानाच्वंगु दु । छापाया अवस्था थथे दुसा प्रशारण माध्यमय् नं नेपालभाषाया थीथी ज्याझ्वः नेपाःया विद्युतीय संचार माध्यमं उतिकं हे महत्व बियाच्वंगु दु । थ्व नं उतिकं महत्वपूर्ण जू । छापा व विद्युतीय संचार माध्यमय् प्राथमिकताया बिषय प्रविधिगत कारणं भिन्नता दइगु स्वभाविक हे खः । थ्व हे झ्वलय् छता खँ बिचाः यायेबहःजू झीसं छापा व विद्युतीय संचार माध्यमं अझ अप्वः नेपाली भाय्या सिवें स्तरीयता कायम यानाः यंकेगु नितिं गुकथं कुतः यात धाःसा जिइ ?

अले मेगु बिचाः वइ थौं नेवाः फोटोग्राफर, कार्टुनिस्ट, ग्राफिक डिजाइनर, प्रशिक्षित अनुभवी पत्रकार मेपिनिगु स्वयां म्हो मजू । अजाःपिनिगु प्रतिभापाखें नेपालभाषा संचार ख्यः गुकथं लाभान्वित जुइ अले उमिगु प्रतिभा व क्षमताया ब्यवसायिक उपयोगिता यानाः उमित नं उत्साह व सन्तुष्टि बिइगु पहल यायेमाःगु ई वयाच्वंगु दु । पहल सुना यायेगु ले ?

थ्वहे न्ह्यसःया लिसः खः - नेपालमण्डल वेब साइट । थौंया ई सुचना प्रविधि व इन्टरनेटया ई खः । नेपालभाषा पत्रकारिता ख्यः तब्याका यंकेगु खःसा छापा व विद्युतीय प्रशारण जक मखु आः झीत सुचना प्रविधि व इन्टरनेट आवश्यक जूगु तायेका । अथेजूगुलिं सूचना प्रविधि व पत्रकारिताया बिषयसं ज्ञान दुपिं पासापिं छपुचः मुनाः दच्छि न्ह्यः छपला छिनागु खः नेपालमण्डल डट कमया नामं ।

दच्छि न्ह्यः अनलाइन पत्रकारिता पाखें न्ह्याकागु पलाखे नेवाःतय्गु भाषा, कला, तजिलजि साहित्य नापं नेवाःत नाप स्वापू दुगु व नेवाःतय्सं मसिकूसें मगाःगु ज्याखँयात बुखँया माध्यमं न्ह्यब्वयेगु व अज्याःगु घटनात आर्काइभ यायेगु ज्या यानागु जुल । उलि जक मखु नेपाः देशं पिने जूगु मनोरंजनात्मक व विविध ज्याखँयात नेपालभाषाया माध्यमं ब्वनामितक थ्यंका ।

थुकथं चाय्कं मचाय्कं न्ह्याकागु पलाः थौं श्रीपंचमिं दच्छि पूवंगु दु । थुगु ई तक वयाबलय् जिमिगु पलाःयात नेपाः देशं दुने व नेपाः देशं पिने च्वनाः नं हःपाः तिबः व ग्वाहालि बियादीम्ह छित दुनुगलं निसें सुभाय् मब्यूसें च्वने जिपिं मफु । अथे जूगुलिं छितः सुभाय् बिइ हे माः । छिकपिन्सं नेपालमण्डल डटकम साइटयात यानादीगु माया मतिनाया नेपालमण्डल पुचः कृतज्ञ जूगु दु । वइगु दिनय् नं छिकपिनिगु माया मतिना व थुकथं हे हःपा तिव व ग्वाहालि दइगु आशा नं नेपालमण्डल पुचः सदां याना हे च्वनी । छिकपिनिगु हे लिधंसाय् जिमिगु पलाः धिसिलाक्क न्ह्याकेगु प्रण यानाच्वना ।

नेपालमण्डल साइट निदँ क्यंगु लसताय् सकलसित भिंतुना ।

More Stories Like this