'नेपालमण्डल'यात सन्ध्या टाइम्सया भिंतुना

नेपालमण्डल डट कम निदँ क्यंगु लसताय् नेपालभाषाया न्हिपौ सन्ध्याटाइम्सपाखें नेपालमण्डल पुचःयात भिंतुना सन्देश प्राप्त जूगु दु । सन्ध्याटाइम्सया सम्पादक सुरेश मानन्धरं व्छया हयादीगु भिंतुना सन्देशय् धयातःगु दु 'संचारयात थूपिं व संचारयात छ्यले सःपिं नेवाः पासापिं जानाः संचालन जुयाच्वंगु नेपालमण्डल डट कम थःगु दछि पूवंकाः निदँय् क्यंगु खँ न्यनाः जि साप लय्ताया । शुरु जूगु हे म्हिगः म्हीग तिनि थें च्वं दछि फुइधुंकल खनिं । ई वंगु हे मचायेक न्ह्याःगु हे थ्व वेबसाइटया सफलता खः थें जिं ताया ।'

'थीथी कारणं नेपाः त्वःताः विदेशय् च्वनाच्वंपिं पासापिंसं थःगु थासं फुकथं मांभाय्यात सेवा यायेगु माध्यम कथं संचालनय् वयाच्वंगु थ्व वेबसाइटपाखें विश्वन्यंकंया नेवाःतय्सं गुलि तःधंगु सेवा कयाच्वन धइगु खँ थन शायद कनाच्वने माली मखु जुइ ।' सन्देशय् न्ह्यथनातःगु दु ।

थ्व वेबसाइट विश्वय् वयाच्वंगु विज्ञानया उपलब्धीयात थःत छिं कथं उपयोग याये जिउ धइगु खँयात छगू बांलाःगु दसु जूगु अले थुकियात अझ च्वन्ह्याका वने फयेमा व थुकिं चूलानाच्वंगु सेवा उपभोग यायेगुपाखें विश्वन्यंकंया नेवाः समाज मद्यायेमा धकाः कामना यासें वय्कलं नेपालमण्डल दछि फुनाः निदँय् क्यंगु लसताय् यक्व यक्व भिंतुना देछानादीगु दु ।

More Stories Like this