निदँय् क्यन नेपालमण्डल डट कम
थौं श्रीपंचमि - 'नेपालमण्डल'या बुदिं
न्ह्य्दँ न्हयःनिसें न्ह्याःगु नेपालभाषाया भाषिक आन्दोलनय् दच्छि न्ह्यः छगू न्हूगु शुरुवात जुल । भाषिक आन्दोलनया पःखालय् मेगु छपाः अप्पा तनेगु ज्या जुल अले उगु अप्पायात नां बिल - नेपालमण्डल डट कम ।
भाषा आन्दोलनया शुरुवात सहित्य मार्फत जूगु खःसां आन्दोलन बुलहुं थीथी ख्यः मार्फत तःब्याका यंकेगु ज्या जुल । उकीयात हे नेपालभाषाया माध्यमं पत्रकारिता यानाः संचार ख्यलं नं भाषिक आन्दोलनयात निरन्तरता बीगु ज्या जुल । संचार जगतय् नं पत्रिकापाखें शुरु जूगु आन्दोलन लिपा विस्तार जुजुं रेडियो, टिभी आदि माध्यमय् नं थ्यन ।
थौं ई सूचना प्रविधि व इन्टरनेटया खः । उगु हे इया ल्यूल्यू झीगु नेपालभाषा आन्दोलनयात नं विकसित रुप बीगु निंतिं दच्छि न्ह्यः श्रीपंचमीया दिनंनिसें शुरु जूगु नां खः, नेपालमण्डल डट कम - अनलाइन पत्रकारिता व नेपालभाषा पत्रपत्रिकाया अनलाइन आर्काइभ ।
दच्छि न्ह्यः अनलाइन पत्रकारितापाखें शुरु जूसां थुगु पोर्टलया मू उदेश्य नेपालभाषाया माध्यमं नेपालमण्डल लागाया भाषा, साहित्य, संस्कृति आदि दक्वं ज्वलंयात इलेक्ट्रोनिक आर्काइभ दयेकेगु खः ।
दच्छि दुने नेपाः व नेवाः ख्यलय् जूगु गतिविधिलिसे विश्वया सामियध व मनोरंजनात्मक बुखँयात झीसं नेपालभाषाया माध्यमं ब्वनामिपिनि न्ह्यःने न्ह्यब्वयेगु व उकियात सुरक्षित यानाः आर्काइभ यायेगुलिइ नेपालमण्डल डट कम पुचलं थःगु ध्यान केन्द्रीत यायेगु ज्या जुल । दच्छिया दुने हे केवल लिखित बुखँ जक मखुसें अडियो, भिडियोया मार्फत नं थःगु सामग्री न्ह्यब्वयेत कुतः नं जुल ।
दच्छितकया दुने नेपाः दुने व नेपाः पिनेया आपालं ब्वनामिपिंसं थुकीयात माया, मतिना यानाः बियादीगु सल्लाह, सुझाव व प्रतिकृयां झीत अझ धिसिलाक्क न्ह्याः वनेत ह:पाः ब्यूगु दु । छिकपिनिगु हे सुझाव कथं थुगु पोर्टलयात अझ सशक्त रुपं भाषिक आन्दोलनया ख्यलय् व निष्पक्ष समाचार, अडियो, भिडियो ब्लग नापं नेपालमण्डल लागाया गतिविधि दुथ्याकेत झी न्ह्याःवनेगु जुइ ।
दच्छिया दुने छिकपिंसं क्यनादीगु मतिना व सद्धभाव प्रति नेपालमण्डल पुचःपाखें कृतज्ञता प्वंकूसें वइगु दँय् नं छिकपिनिगु माया व मतिना नापं मचा:मगा: कुला: छ्याताया अपेक्षा यासें छिकिपं सकसितं आपालं आपा सुभाय् देछासें थःगु पलाः अझ धिसिलाक्क न्ह्याका वनेगु प्रतिवद्धता प्वंकाच्वना ।
